Қатты өкінемін : Жетісуда қатыгездікпен өлтірілген әйелдің күйеуі сотта жауап берді

АСТАНА, 20 желтоқсан – Sputnik.Талдықорғанда 32 жастағы Айзат Жұманованы өлтірді деген күдікпен ұсталған марқұмның күйеуі Айбар Жанболаттан сотта жауап алынды, деп хабарлайды Sputnik Қазақстан.

КТК арнасының мәліметінше ол жұбайын опасыздық жасады деп айыптаған. Күдікті әйелін ұрғанын мойындаса да, бас сүйегі мен қабырғасын сындырмағанын мәлімдеді. Ал сараптама келіншектің өлімі бас жарақатынан болғанын көрсетті.

Марқұмның жақындарының айтуынша, айыпталушы әйелін ұрып-соғып қана қоймай, тіпті тістерін де сындырған. Айбар Жанболаттың өзі кінәсін жартылай ғана мойындап отыр. Ол адам өлтіруді жоспарламағанын, тек әйелін бірнеше рет шапалақпен ұрғанын айтты. Айыпталушы сөзін марқұм жұбайының ата-анасынан кешірім сұраудан бастады. Айтуынша, жанжалға себеп болған — телефон қоңырауы. Сол сәтте мас күйде күйеуі әйелін қызғанып, соққыға жыққан. Кеуде тұсынан жұдырықпен ұрған кезде әйел шалқасынан, тас төселген жерге құлап, есінен танған.

"Марқұм жарымның ата-анасынан, әке-шешесінен, туған-туыстарынан және өз ата-анамнан қайғырып, кешірім сұраймын. Болған іске қатты өкінемін. Бұл оқыс жағдай түсінбеушіліктен, білмеушіліктен, өзімнің сабырсыздығымнан болды. Мен марқұм жарымды жақсы көрдім. Жақсы көрем де. Мен оны қасақана өлтіретін ойым да, ниетім де болған жоқ. Жарымнан айырылып, баламның жетім қалғаны маған да оңай болып тұрған жоқ", - деді айыпталушы Айбар Жанболат.

Айбар Жанболат жедел жәрдем шақыруға асықпаған. Әйел есінен танып қалғаннан кейін ғана оны ауруханаға өзі жеткізген. Сот отырысында марқұмның өмірінің соңғы сәттері бейнеленген жантүршіктіретін бейнекадрлар алғаш рет көрсетілді.

Ал сот-медициналық сараптама қорытындысы бойынша марқұмда бас жарақаты, мидың ісінуі, жамбас және аяқ-қол сүйектерінің сынғаны анықталған.

"Қорытындыда: бас-ми жарақаты. Ол жерде біздің көрсетуіміз бойынша басқа, соның ішінде бетіне салынған бірнеше жарақат, шүйде жағынан бас сүйегі сынған. Сынық бас сүйегінің астына өтіп кеткен. Соның бәрін комбинация дейді. Бәрін қосып, бір бас-ми жарақаты деп есептелді. Оның бәрі қатты доғал заттан болған", - дейді сот-медициналық сарапшы Тахир Халимназаров.

Сараптама қорытындысы әйелді күйеуі "атпен сүйреген" деген ақпаратты растаған жоқ. Сондай-ақ марқұмның жүктілігі болмағаны анықталды. Ал айыпталушының айтуынша, оқиға болған сәтте екі жасар қызы ұйықтап жатқан.

Еске сала кетейік, қайғылы жағдай қалай болғанын Sputnik Қазақстан тілшісі Баласаз ауылына арнайы барып біліп қайтқан еді.