Қазақ қызы әлемдік рейтингте көтерілді

Софья Ақтаева – күміс жүлдегер. Қазақстандық семсерлесу шебері Біріккен Араб Әмірліктерінде өткен әлем кубогында жүлдеге ілікті.

Ол іріктеу кезеңдерінде барлық қарсыласын ұтып, финалда ресейлік Стефания Часовниковаға есе жіберді. Қорытынды есеп: 15:11.

Бибісара үздік үштікте. Халықаралық шахмат федерациясы өткен жылды қорытындылап, әлемдік рейтингті жаңартты. Оған сәйкес қазақ қызы Бибісара Асаубаева блиц бағыты бойынша тізімде бірден бес саты жоғарылап, үшінші орынға жайғасты. Бірінші және екінші орында Қытай өкілдері. Ал, алдыңғы бестікті Ресей қыздары түйіндеп тұр. Айта кетейік, Бибісара Асаубаева бұған дейін 2021 және 2022 жылдары блиц шахматтан әлем чемпионы атанған болатын. Жуырда ол үшінші рет осы жетістігін қайталап, отандық спорт үшін тарихи нәтиже тіркеді. Әлемдік шахмат үшін де айтулы жетістік деуге болады. Өйткені 2012 жылдан бері өткізіліп келе жатқан дүниежүзілік додада әйелдер арасында ресейлік Екатерина Лагно мен қазақстандық Бибісара Асаубаева ғана үш дүркін әлем чемпионы атанды. Дәл осы жетістікке мемлекет басшысы да назар аударып, Бибісара Асаубаеваға арнайы құттықтау жолдады және ел шахматын дамытуға қосқан үлесі үшін ІІ дәрежелі «Барыс» орденімен марапаттады.

Садриддин Ахмедов ақпанда жұдырықтасады

Садриддин ақпанда рингке оралады. Қазақстандық кәсіпқой боксшы Садриддин Ахмедов әлеуметтік желідегі парақшасына кезекті жекпе-жегі туралы ақпарат жариялады. Ол жерде келесі кездесуі ақпан айында АҚШ-та өтетіні жазылған. Спортшының өзі қазір Лос-Анджелес қаласында жаттығу жиынын өткізіп жатыр. Сол жердегі суреттерін де салған. Ал қарсыласы туралы әзірге мәлімет жоқ. Айта кетейік, Садриддин Ахмедов бірер ай бұрын АҚШ-тағы бокс кешінде мексикалық Эдгардо Веласкеспен жұдырықтасуы тиіс болған. Алайда бұл жекпе-жек белгісіз себептермен өтпей қалды. Ал соңғы рет шаршы алаңға былтыр сәуір айында шықты. Ол кезде қазақстандық боксшының мексикалық Элиас Эспадаспен айқасы тең аяқталды. Жалпы Садриддин кәсіпқой бокста жеңіліп көрмеген. Бүгінге дейін 16 кездесу өткізді. Оның 15-інде жеңіске жетті. Біреуі, жоғарыда айттық, тең аяқталды.

Көкпаршыларға ерекше құрмет көрсетілді 

Көкпаршыларға мың доллардан сыйақы берілді. Шымкент қаласында ұлттық спорт өкілдеріне ерекше құрмет көрсетілді. Жергілікті әкім Ғабит Сыздықбеков аймақ намысмын қорғап жүрген көкпаршыларды жинап, өткен жылды қорытындылады және алдағы жылға жоспарды талқылады. Жиын барысында өңірдің атынан өнер көрсетіп, аймақаралық және республикалық деңгейдегі жарыстарда тұрақты жүлде әкеліп жүрген жігіттерге қаржылай сыйақы таратты. Командадағы 12 жігіт және оларлың бапкерлері де назардан тыс қалмады. Айта кетейік, Шымкент құрамасы былтыр алғаш рет өткізіліген жаңа форматтағы, яғни, клубаралық форматтағы Қазақстан Кубогында топ жарды. Бұған қоса, жылдың басты жарысы ел чемпионатында екінші орынға тұрақтаған болатын. Енді биыл жігіттердің шеберлігін шыңдап, жаттығу жұмыстарын жиілетіп, көрсеткішті одан сайын арттыру жоспарланып отыр.