Қазақфильм мен ұлттық киноны қолдау орталығы біріктіріледі

АСТАНА, 8 қараша – Sputnik. Мәдениет және ақпарат министрі Аида Балаева ұлттық киноны қолдау орталығын "Қазақфильм" киностудиясымен біріктіру мәселесі қарастырылып жатқанын мәлімдеді, деп хабарлайды Sputnik Қазақстан.

Министрлік отандық киноны дамыту жұмысын жалғастыра береді. Ал барлық ұйымдастырушылық және техникалық шешімдер ашық әрі заң аясында қабылданады.

"Қазір ұлттық киноны қолдау орталығын "Қазақфильм" киностудиясымен біріктіру мәселесі қарастырылып жатыр. Бұл өндіріс процесін жеңілдетіп, тиімділікті арттыруға бағытталған қадам", - дейді Балаева.

Осы орайда министр заңға енгізілген жаңа түзетулерден кейін мемлекеттік қаржыландырудың 30 пайызын тікелей "Қазақфильм" киностудиясына бөлуге мүмкіндік ашылғанын да айтты.

"Бұл – ұлттық кино индустриясының көшбасшысы үшін үлкен мүмкіндік. Бүгінде киностудия ұлттық кино қорын цифрландыру және қалпына келтіру жұмыстарын жүргізіп жатыр. Сонымен бірге "Қазақанимация" жобасы іске қосылып, елімізде алғаш рет анимацияны креативті индустрияның бөлігі ретінде дамыту тұжырымдамасы әзірленді", - деді Балаева.