Қазақстан экономикасында 9,4 млн адам жұмыспен қамтылған

АСТАНА, 27 тамыз – Sputnik. Ұлттық статистика бюросы 2026 жылдың II тоқсанындағы халықтың жұмыспен қамтылуы туралы деректерді жариялады.

"2026 жылдың II тоқсанында жүргізілген халықтың жұмыспен қамтылуын іріктемелі зерттеу деректеріне сәйкес, Қазақстан экономикасының түрлі салаларында 9,4 млн адам жұмыспен қамтылған. Оның 7,3 млн-ы жалдамалы жұмыс істесе, тағы 2,1 млн адам өзін-өзі жұмыспен қамтыған", – делінген хабарламада.

Жұмыспен қамтылғандардың ең көп үлесі мына салаларға тиесілі:

сауда – 16,8%;

білім беру – 13,3%;

өнеркәсіп – 12,4%;

ауыл шаруашылығы – 10,5%;

көлік және қоймалау – 7,1%;

құрылыс – 6,8%;

денсаулық сақтау және әлеуметтік қызмет көрсету – 6,6%.

Ұлттық статистика бюросының мәліметінше, 2025 жылдың II тоқсанымен салыстырғанда бірқатар салада жұмыспен қамтылғандар саны артқан.

Ең жоғары өсім жылжымайтын мүлікпен жасалатын операциялар саласында тіркелді – 37 мың адамға.

Сондай-ақ білім беру саласында жұмыспен қамтылғандар саны 31,1 мың адамға, денсаулық сақтау саласында 21,2 мың адамға өскен.

Бұдан бөлек, өнер, ойын-сауық және демалыс саласында – 15,1 мың адамға, кәсіби, ғылыми және техникалық қызметте – 7,7 мың адамға, қаржы және сақтандыру саласында 7,4 мың адамға артқан.