Қазақстан Орталық Азияға астық экспортын 32% ға ұлғайтты

Қазақстан Орталық Азияға экспорттайтын астық көлемін 32 пайызға ұлғайтты.

,іздің ел кейінгі жылдары әлем бойынша жаңа нарықтарға астық шығарды ма?

Астық Еуропа мен Африкаға дейін жеткізіледі

Астық экспортының географиялық ауқымы жылдан жылға кеңейіп келеді. Қазір Орталық Азиядан бөлек, Оңтүстік-шығыс Азия, Таяу Шығыс, Еуропа, тіпті Солтүстік Африкаға дейін өнім жеткізіле бастады. Соның ішінде Бельгия, Португалия, Норвегия, Ұлыбритания, Вьетнам, Марокко және Алжир сияқты мемлекеттер бар. Кейінгі бір жыл ішінде Балтық порттары арқылы 672 мың тонна өнім экспортталды. Соның шамамен алтыдан бір бөлігі Эстонияның Силламяэ порты арқылы өтіп, Солтүстік Африка елдеріне жөнелтілді. Биыл қазақстандық диқандар 27 млн тонна астық жинады. Әр гектардан алынған орташа өнім 17 центнер шамасында. Мұндай оң нәтижеге көктемгі далалық жұмыстарды ерте қаржыландыру арқылы қол жеткіздік, дейді мамандар. Яғни шаруалар ерте қамданды және сапалы тұқымға ерекше мән берген.

Мұрат Оразбеков, диқан:

- Былтыр алқапта дәнді жасымық ектік. Ол топырақты азотпен байытады. Күзде жерді тыңғылықты өңдедік. Сосын тұқым таңдауға аса мән бердік. Ылғал мөлшері де жеткілікті болды. Ең маңыздысы - еңбек ұжымы нағыз кәсіби мамандардан жасақталды. 

Астықты терең өңдеуге басымдық беріледі

Биыл көлік шығындарын субсидиялауға Үкімет резервінен 31 млрд теңге бөлінді. Бұл қолдау шарасы отандық өнімнің жаңа экспорттық бағыттарға шығуын, бұрын болған нарықтарға қайта қол жеткізуді және баламалы логистикалық маршруттар бойынша алыс елдерге тауар тасымалдауды қамтамасыз етті. Нәтижесінде жаңа және қалпына келтірілген нарықтарға экспортталған астық көлемі 2,5 млн тоннадан асты. Елде алдағы уақытта астықты терең өңдеуге басымдық беріледі. 2028 жылға дейін бидай мен жүгеріні өңдеуге арналған 5 ірі жоба жүзеге асырылады. Олардың жылдық өндіріс қуаты 4,8 млн тонна болады.

 Айдарбек Сапаров, ҚР Ауыл шаруашылығы министрі:

- Салаға салынатын инвестиция көлемі 2,6 млрд АҚШ долларды құрайды. 3,3 мың жаңа жұмыс орны ашылады. Өнім ассортименттері амин қышқылдары, сироптар және витаминдермен кеңейтіледі. Инновациялық өндірістерді шикізатпен қамтамасыз ету мәселесі, жүгерінің егіс алқаптарының кеңейтуді көздейтін әртараптандыру шаралары шеңберінде жүзеге асырылады.

ЖИ бидай қорын есептейді және бақылайды  

Алдағы уақытта цифрлық технология және жасанды интеллектінің көмегімен бидай қорын есепке алатын және бақылайтын тиімді жүйе құрылуға тиіс. Бұл Мемлекет басшысы жүктеген маңызды міндеттердің бірі. Қолданыстағы астық қамбалары жаңғыртылып, заманауи элеваторлар салынады. Бидай қабылдауды және жөнелтуді есепке алатын электрондық жүйенің енгізілуі жеке элеваторлар құрылысын қаржыландыруға арналған бағдарламаның бір шартына айналады.