Қазақстан шекарасының қай тұсында жиі заң бұзылады

Ұлттық қауіпсіздік комитетінің дерегіне қарағанда, мемлекеттік шекараны заңсыз кесіп өту фактілері жылдың жылы мезгілінде және түнгі уақытта жиі тіркеледі. Заңбұзушылық еліміздің солтүстік және оңтүстік шекараларында тіркеледі.

Биыл 4 245 шетелдік Қазақстаннан мәжбүрлі түрде шығарылып, 148 адам қылмыстық жауапкершіліке тартылды. Әдетте, заң бұзушылар өткізу пункттерін орағытып, жаяу немесе көлік құралымен мемлекеттік шекараны кесіп өтуге тырысады.

Таяуда Морокко корольдігінің екі азаматы Ресейге заңсыз өтпек болған кезде Солтүстік Қазақстан облысында қолға түсті.

-Морокконың 2 азаматы қолданыстағы визасыз режимді пайдаланып, Қазақстанға халықаралық әуежайлар арқылы келген. Оған дейін олар Біріккен Араб Әмірліктерінде, Түркия мен Қатарда болып, содан кейін Қазақстан аумағына Әзербайжан арқылы кірген. Мұнан ары олар Ресейге өтіп кету үшін көрші мемлекетпен шектесетін облыс орталығына жол тартқан. Көрші елде тұруға лайықты орын табылмаған жағдайда олар одан ары Еуропа елдеріне өтпек болған, - делінген ведомствоның агенттік сауалына берген жауабында.

Комитет мәліметінше, биыл шекара күзеті қызметі Қылмыстық кодекстің 394-бабы 1-тармағы бойынша (заңсыз көші-қон ұйымдастыру) 8 қылмыстық іс, ал аталған таптың 2-тармағы бойынша 10 қылмыстық іс қозғаған.

Жалпы, 2025 жылы елімізге Өзбекстаннан - 4,7 млн-ға жуық, Ресейден - 3 млн, Қырғызстаннан - 2,8 млн, Қытайдан - 790 мың, Тәжікстаннан - 731 мың, Беларусьтан - 139 мың, Үндістаннан - 127 мың, Түркиядан - 119 мың, Германиядан - 88 мың, ал Әзербайжаннан 83 мыңнан астам адам келді.

Тамыз айында жыл басынан 235 мың шетелдік әкімшілік жауапкершілікке тартылғаны белгілі болған еді.