Қазақстанда алғаш рет нанофильтрациялық респираторлар өндірісі жолға қойылады

2026 жылғы 8 мамыр күні Ақмола облысы Аршалы ауданының «AQMOLA» индустриялық аймағында Қазақстанда алғаш рет атом энергетикасы мен уран өндіру салаларында қолданылатын нанофильтрациялық технологиялар негізінде тыныс алу органдарын қорғайтын респираторлар мен арнайы жеке қорғаныс құралдарын шығаратын өндірістік кешен құрылысының басталуына арналған салтанатты рәсім өтті, – деп хабарлайды Aikyn.kz сайты.

Аталған бастама еліміз үшін жаңа технологиялық бағытты дамытуға, сондай-ақ наноматериалдар мен заманауи қорғаныс шешімдері саласында құзырет орталығын қалыптастыруға бағытталған.

Технологияны жетілдірумен Л.Н. Гумилев атындағы Еуразия ұлттық университетінің ғалымдары өндірістік кешен жанынан құрылатын ғылыми-зерттеу зертханасында айналысады. Отандық өнімдердің шетелдік баламаларға қарағанда қолжетімді болуымен қатар, радиоактивті бөлшектерді сүзу тиімділігі дәстүрлі әдістермен салыстырғанда айтарлықтай жоғары болады деп күтілуде.

Жеке қорғаныс құралдарының толық өндірістік циклін қалыптастыру және нанофильтрациялық материалдар бойынша зертхана құру импортты алмастыруға, экспорттық әлеуетті арттыруға, ұлттық ғылыми-технологиялық мектептің дамуына және өңірдің өнеркәсіптік әлеуетін күшейтуге мүмкіндік береді.

Бұл өндіріс ғылым, өнеркәсіп және инновациялық технологияларды тоғыстыра отырып, Қазақстанда жоғары технологиялы жеке қорғаныс құралдарын өндіретін заманауи өндірістік базаның қалыптасуына жол ашады.

Бастама ғылымға негізделген экономиканы дамытуға бағытталған мемлекеттік саясат аясында жүзеге асырылып, ғылым, өнеркәсіп және инновациялық технологиялардың тиімді интеграциясын қамтамасыз етуге арналған.

Өндірістік кешен «Энергоатом» ЖШС мен Л.Н. Гумилев атындағы Еуразия ұлттық университетінің қатысуымен жүзеге асырылуда. Сондай-ақ Ақмола облысы Аршалы ауданы әкімдігі және республикалық маңызы бар «AQMOLA» индустриялық аймағын басқарушы компания – «Aqmola Industry» ЖШС тарапынан қолдау көрсетілуде.

Инициативаның іске асырылуы «AQMOLA» индустриялық аймағының дамуына маңызды серпін беріп, жаңа жұмыс орындарын ашуға және ғылыми қауымдастық пен өндірістік сектор арасындағы байланысты нығайтуға мүмкіндік береді.

Іс-шараға ЕҰУ өкілдері, Аршалы ауданы әкімдігінің қызметкерлері, «Aqmola Industry» компаниясының мамандары, ғалымдар мен зерттеушілер қатысты.

«Бүгін ғылым, экономика, өндіріс пен билік бір арнада тоғысып отыр. Дәл осындай байланыс қана дамуға жол ашады. Мемлекет басшысы Қасым-Жомарт Тоқаев өз Жолдауларында ғылымға негізделген экономиканы қалыптастыру мәселесіне үнемі ерекше назар аударып келеді. Ол ғылымға сүйенген экономиканы дамыту мемлекеттік саясаттың негізгі стратегиялық бағыттарының бірі екенін бірнеше рет атап өткен болатын. Бүгін біз осы бағыттағы нақты нәтижені көзбен көріп отырмыз: өндіріс пен өнеркәсіп өкілдері, сондай-ақ инвесторлар өздері ғалымдармен байланыс орнатып, ғылымға бет бұруда. Бұл – маңызды әрі жүйелі өзгерістің көрінісі. Осындай ықпалдастықтың нәтижесінде ғана өнеркәсіп жаңа деңгейде дамып, өнімнің бәсекеге қабілеттілігі артып, оның өзіндік құны төмендей түседі», – деді Еуразия ұлттық университетінің Басқарма төрағасы – ректоры Ерлан Сыдықов.

Өндірістік кешеннің болашағы мен мүмкіндіктері туралы «Энергоатом» ЖШС директоры Антон Скоков өз сөзінде атап өтті.

«Біз Қазақстанға өндірістік қауіпсіздікті арттырудан бастап, адамдарды зиянды әрі ластаушы заттардан қорғауға дейінгі көптеген сұранысқа ие әрі тиімді шешімдер ұсынамыз. Сонымен қатар елімізде бұрын өндірілмеген жоғары технологиялық материалдарды шығаруды жоспарлап отырмыз. Бұл бағыттағы жетекші компаниялардың біріне айналып, отандық өнеркәсіптің дамуы мен технологиялық тәуелсіздіктің нығаюына өз үлесімізді қосуды мақсат етеміз», – деді спикер.

Жаңа өндірістің ел экономикасына қосатын үлесі мен мүмкіндіктеріне Аршалы ауданы әкімінің орынбасары Абай Бекбаев, «Aqmola Industry» ЖШС директорының орынбасары, басқарушы компания өкілі Рүстем Жүнісов және Аршалы ауданының прокуроры Әлия Сүлейменова өз сөздерінде ерекше назар аударды.

Қатысушылар бұл бастаманың іске қосылуы Қазақстандағы ғылымды қажет ететін өндірісті дамытудағы маңызды қадам болатынын, сондай-ақ ғылыми қауымдастық, өнеркәсіп және мемлекет арасындағы өзара ынтымақтастықты нығайтуға ықпал ететінін атап өтті.