Қазақстанда алғаш рет премиум санаттағы болат өндірісі жолға қойылады

Компания өкілдерінің Теміртауға сапары кәсіпорынды жаңғыртудың ауқымды жоспарын іске асырудағы маңызды кезең болды.

Qarmet металлургиялық комбинатында WISDRI компаниясының делегациясымен кездесу өтті. Metallurgical Corporation of China (MCC) құрамына кіретін бұл ұйым әлемдік металлургия саласында инженерлік және ғылыми шешімдерді әзірлеу бойынша көшбасшылардың бірі саналады. 1955 жылы құрылған WISDRI компаниясының тәжірибесінде ондаған халықаралық жоба бар — олардың қатарында суық және ыстық прокат желілері, мырыштау технологиялары және толық экологиялық циклді өндірістік кешендер бар.

Сапар барысында тараптар серіктестіктің стратегиялық бағыттарын және Qarmet өндірісін жаңғыртуға мүмкіндік беретін техникалық шешімдерді талқылады. Негізгі бастамалар қатарында құю-илек кешенін салу, сондай-ақ шойынды десульфурациялау, RH, қышқылды регенерациялау қондырғыларын және үздіксіз құю машиналарын жаңарту жобалары бар. Бұл жобаларды жүзеге асыру 2026–2027 жылдарға жоспарланып отыр.

Qarmet өкілдерінің айтуынша, WISDRI инженерлері өндірістің тиімділігін және экологиялық тұрақтылығын арттыратын бірқатар инновациялық шешімдер ұсынған. Әсіресе, қоршаған ортаға шығарындыларды азайту, ресурстарды үнемдеу және энергия тұтынуды оңтайландыруға бағытталған заманауи технологиялар ерекше қызығушылық тудырды.

Құю-илек кешенінің құрылысы Qarmet кәсіпорнын жаңғыртудың ауқымды бағдарламасындағы негізгі кезеңдердің бірі болмақ. Бұл жоба Қазақстанның технологиялық тәуелсіздігін нығайтып қана қоймай, машина жасау, құрылыс, энергетика және қорғаныс өнеркәсібі салаларында жоғары сұранысқа ие премиум сапалы болатты өндіруге мүмкіндік береді.

Жаңа өндірістік нысандардың іске қосылуы отандық металлургияның бәсекеге қабілеттілігін арттырып, жаңа жұмыс орындарын ашуға, салық түсімдерінің өсуіне және өңірдің өнеркәсіптік дамуына серпін бермек.

– WISDRI секілді серіктестермен ынтымақтастық Qarmet кәсіпорнының технологиялық деңгейін жаңа белеске көтеріп, ұлттық экономиканың дамуына елеулі үлес қосады деп сенеміз, – деп атап өтті компания өкілдері.

Осылайша, алдағы жылдары Теміртауда жүзеге асырылатын жобалар тек өндірістік инфрақұрылымды жаңғырту ғана емес, сонымен қатар Қазақстан металлургиясының жаңа буынын — экологиялық таза, инновациялық және әлемдік нарыққа бағытталған өндіріс моделін қалыптастыру жолындағы маңызды қадам болмақ.

Айта кетейік, бұған дейін Qarmet компаниясының «Шахтинская» шахтасында жаңа еңбек жетістігі тіркелген болатын — учаскелік бригада бір айда жүздеген метр көмір қазып, өз рекордын жаңартты.