​Қазақстанда байланыс қымбаттайды: Altel мен Tele2 желтоқсаннан, Beeline қаңтардан бастап тарифтерін көтереді

Қазақстандағы ұялы байланыс операторлары — Altel, Tele2 және Beeline абоненттік төлемақыны көтеретінін ресми түрде хабарлады. Өзгерістер 2025 жылдың соңынан бастап 2026 жылдың басына дейін күшіне енеді және мобильді байланыс пен кеңселік интернет тарифтерін қамтиды.

Altel мен Tele2 компаниялары тарифтерді қайта қарауды 2025 жылдың 25 желтоқсанынан бастайды. Ресми мәлімдемеде операторлар бұл шараны желілерді дамыту мен жаңғыртуға кететін шығындардың өсуімен, қызмет көрсетуге байланысты шығындармен және салық заңнамасындағы өзгерістермен түсіндірді. «Компания тарифтік жоспарлардың бағасын қайта қарамақ. Бұл — мәжбүрлі қадам. Ол желілерді дамыту мен жаңарту шығындарының артуына, қызмет көрсетуге және салық заңнамасындағы өзгерістерге байланысты. Абоненттік төлемді түзету бізге сервистің тұрақтылығын сақтап, одан әрі сапалы қызмет көрсетуге мүмкіндік береді», — делінген хабарламада.

Абоненттерге жаңа тарифтер туралы толық ақпарат SMS арқылы жіберілмек.

Beeline болса, өзгерістерді 2026 жылдың 1 қаңтарынан енгізетінін жариялады. Компания мобильді және кеңселік интернеттің, сондай-ақ тарифтік жоспарлардың бағасы түзетілетінін мәлімдеді. Оператордың айтуынша, ҚҚС мөлшерлемесінің өсуі қызметтердің өзіндік құнына тікелей әсер етеді. «ҚҚС мөлшерлемесінің өзгеруі байланыс, интернет және қосымша сервистердің бағасына әсер етеді. Осыған байланысты тарифтік жоспарлар бойынша абоненттік төлем қайта қаралады. Біз пайдаланушыларды жаңа бағалар туралы кемінде 30 күн бұрын хабардар етеміз», — деп түсіндірді компания.

Beeline-нің есебінше, жаңа ҚҚС мөлшерлемесі оператордың операциялық шығындарын 35 млрд теңгеге арттырады. Компания қазіргі бағаларды ұстап тұру инвестиция көлемін азайтып, инфрақұрылымды дамытуға кедергі келтіретінін атап өтті: «Егер біз бағаларды бекітіп қойсақ, салаға инвестициялар айтарлықтай төмендейді. Жаңа жабдық орнату және қолданыстағы желіні қажетті көлемде жаңарту мүмкін болмайды. Бұл байланыс сапасына әсер етеді, себебі желі жүктемеге төтеп бере алмайды. Телекоммуникация саласындағы жалпы тоқырау цифрландыруға байланысты басқа салаларға да әсер етеді. Қолжетімді әрі тұрақты интернет — мобильді қосымшалар, финтех және басқа да цифрлық өнімдердің дамуы үшін негіз. Сондықтан тарифті түзету — тек байланыс саласында ғана емес, кез келген салада қажет процесс».

Осылайша, операторлар тарифтердің өсуін қызмет сапасын сақтау және телекоммуникациялық инфрақұрылымды дамытуға бағытталған шара ретінде түсіндіруде.

Бүгін, 14:17