Қазақстанда радиоактивті қалдықтармен жұмыс істеу жөніндегі ұлттық оператор айқындалды

АСТАНА, 6 қараша – Sputnik. Қазақстанда радиоактивті қалдықтармен жұмыс істеу жөніндегі ұлттық оператор айқындалды. Бұл туралы Қазақстан Атом энергиясы жөніндегі агенттігі хабарлады.

Ведомствоның 2026 жылғы 30 қазанда қол қойылған бұйрығына сәйкес, ұлттық оператор болып "Қазақстан Республикасының Ұлттық ядролық орталығы" шаруашылық жүргізу құқығындағы республикалық мемлекеттік кәсіпорны айқындалды.

"Қазақстанда радиоактивті қалдықтар бұрынғы жылдардағы қызмет нәтижесінде, оның ішінде ядролық сынақтар жүргізу, уран өндіру және қайта өңдеу барысында жинақталған", – деп атап өтті ведомство.

Қазіргі уақытта радиоактивті қалдықтар ядролық қондырғыларды пайдалану, уран өндіретін және қайта өңдейтін кәсіпорындардың қызметі барысында, сондай-ақ өнеркәсіпте, медицинада және ғылым саласында түзіледі. Алдағы уақытта олар атом электр станцияларын пайдалану кезінде де түзілетін болады.

"Ұлттық оператор радиоактивті қалдықтармен қауіпсіз жұмыс істеуге қатысты жұмыстарды орындайды. Оның қызметінің негізгі бағыттарының бірі радиоактивті қалдықтарды көмуге арналған инфрақұрылымды құру және пайдалану, сондай-ақ тиісті объектілерді жабу және пайдаланудан кейінгі мониторингтеу жұмыстарын жүргізу болмақ", – делінген хабарламада.

Бұдан бөлек, Ұлттық оператор мемлекеттік меншіктегі немесе мемлекеттік меншікке берілуге жататын ядролық мұра объектілерін жою және консервациялау жұмыстарын жүргізеді. Оның міндеттеріне заңнамада көзделген уран өндіру мен қайта өңдеу салдарын жою жөніндегі жұмыстар да кіреді.

"Атом энергетикасының дамуына байланысты Қазақстан үшін радиоактивті қалдықтармен, оның ішінде өткен онжылдықтарда жинақталған қалдықтармен қауіпсіз жұмыс істеуді қамтамасыз ету және оларды көмуге қажетті инфрақұрылымды құру маңызды", – деп санайды агенттік.

Бұл қалдықтарды ұзақ мерзімге сенімді оқшаулауға, халық пен қоршаған ортаға төнетін радиациялық қауіп-қатерлерді азайтуға және жинақталған қалдықтар мәселесін болашақ ұрпаққа қалдырмауға мүмкіндік береді.