Қазақстанда Стрептоцидтің бір сериясы не себепті сатылымнан алынғаны белгілі болды

— Зертханалық сынақ нәтижесінде дәрілік заттың сапасы нормативтік құжат талаптарына сәйкес келмейтіні анықталып, оны сатылымнан алу жөнінде шешім қабылданды, — делінген хабарламада.

Сонымен қатар министрлік бұл жағдайда қолданылатын заң нормасын еске салды.

— Қазақстан Республикасының «Халық денсаулығы және денсаулық сақтау жүйесі туралы» Кодексінің 259-бабы 1-тармағына сәйкес, уәкілетті орган дәрілік заттар мен медициналық бұйымдар денсаулық сақтау саласындағы Қазақстан Республикасының заңнама талаптарына сәйкес келмейтін жағдайларда қолданылуын, сатылуын немесе өндірісін тоқтатуға немесе тыйым салуға, сондай-ақ айналымнан алуға немесе қолдануын шектеуге құқылы, — делінген ресми жауапта.

Айта кетейік бұған дейін «Стрептоцид» дәрісінің бір сериясы сатылымнан алынғанын жазғанбыз. ҚР Денсаулық сақтау министрлігінің Медициналық және фармацевтикалық бақылау комитетінің бұйрығына сай, тыйым салынған дәрі — «Стрептоцид», таблетка, 300 мг, 10 таблеткадан қабыршақты қаптамада, 5 қабыршақты орамнан жасалған қатты қағаз қорапта. Өндіруші — «Химфарм» АҚ. Бұл серияның жарамдылық мерзімі — 2030 жылғы тамызға дейін.

Дегенмен, стрептоцид дәрілік затының тіркеу куәлігі қолданыста. Комитеттің шешімі тек 25080430 сериясына қатысты қабылданғанын атап өту керек. ҚР ДСМ мәліметінше, басқа сериялар шектеусіз нарық айналымында.