Қазақстанда жылжымайтын мүлік паспортын алу тәртібі өзгереді

1 маусымнан бастап жылжымайтын мүліктің негізгі құжаттары – техникалық және кадастрлық паспорттарды тек онлайн алуға болады, деп хабарлайды TengriHome. "Ұлттық ақпараттық технологиялар" АҚ ("ҰАТ" АҚ) мәліметінше, бұрын оларды рәсімдеу үшін ХҚКО-ларға бару қажет болатын.

Поделиться

1 маусымнан бастап жылжымайтын мүліктің негізгі құжаттары – техникалық және кадастрлық паспорттарды тек онлайн алуға болады, деп хабарлайды TengriHome. "Ұлттық ақпараттық технологиялар" АҚ ("ҰАТ" АҚ) мәліметінше, бұрын оларды рәсімдеу үшін ХҚКО-ларға бару қажет болатын.

Бұл құжаттар не үшін қажет?

Техникалық паспортта нысанның орналасқан жері, ауданы мен жоспарынан бастап, салынған жылына дейінгі негізгі деректер көрсетіледі. Кадастрлық паспорт — жылжымайтын мүліктің сипаттамалары, сондай-ақ жер учаскесі туралы мәліметтер қамтылған сәйкестендіру құжаты. Ол мынадай жағдайларда рәсімделеді:

жылжымайтын мүліктің техникалық немесе сәйкестендіру сипаттамалары өзгергенде (мысалы, реконструкциялаудан, қайта жоспарлаудан немесе қайта жабдықтаудан кейін); меншік иесі пәтер немесе үй туралы деректерді нақтылағысы немесе жаңартқысы келгенде; нысанның нақты сипаттамалары мен құжаттағы деректер арасында сәйкессіздіктер анықталғанда. Мұндай жағдайда мемлекеттік техникалық тексеру жүргізіліп, оның қорытындысы бойынша жаңартылған кадастрлық паспорт рәсімделеді. Неге бұл процесс электронды форматқа көшіріледі?

"ҰАТ" АҚ мұны цифрлық қызметтерді танымал етумен түсіндіреді. Баспасөз қызметінің хабарлауынша, 2021 жылы қазақстандықтар eGov.kz порталы арқылы техникалық паспорт пен кадастрлық паспорттың телнұсқасын алуға 100 мың өтінім жіберген. Бұл жалпы сұраныстар көлемінің 22 пайызын құрады. 2025 жылы көрсеткіш екі есеге жуық өсіп, 41 пайызға жеткен. Бұл ретте бұған дейін төлем жасау және дайын құжатты алу үшін қазақстандықтар ХҚКО-ларға баруға тиіс болатын.

"Мемлекеттік қызметтерді одан әрі цифрландыру аясында 2026 жылғы 1 маусымнан бастап ХҚКО-лардағы операторлар арқылы жылжымайтын мүлік нысандарының техникалық паспортын және кадастрлық паспорттың телнұсқасын беруге өтініш қабылдау тоқтатылады. Қызметтер тек eGov.kz порталы және eGov mobile мобильді қосымшасы арқылы онлайн форматта ұсынылады. Енді пайдаланушыларға төлемді бөлек жасап, техпаспорт алу үшін ХҚО-ға барудың қажеті жоқ – бүкіл процесс электронды түрде қолжетімді, ал дайын анықтама eGov.kz жеке кабинетінде болады", - деп нақтылады ҚР жасанды интеллект және цифрлық даму бірінші вице-министрі Ростислав Коняшкин.

Онлайн қызметті қалай пайдалануға болады?

Ол үшін келесі қадамдарды орындау қажет:

eGov.kz порталында авторлану және "Басты бет" - "Жылжымайтын мүлік" - "Сатып алу, сату, жалдау" немесе "Тұрғын үй қатынастары" бөліміне өту; "Жылжымайтын мүлік нысандарының техникалық паспортын беру" немесе "Кадастрлық паспорттың телнұсқасын беру" қызметін таңдау; өтініш түрін және жылжымайтын мүлік түрін көрсету, сондай-ақ "Азаматтарға арналған үкімет" МК" КЕАҚ филиалын таңдау; қажетті деректерді толтырып, төлем жасау және қол қоюдың қолжетімді тәсілдері бірімен сұранысқа қол қою.

Google News арқылы жаңалықтарымызды қадағалаңыз

Жазылу

құжат пәтер баспана тұрғын үй