Қазақстандықтар бензинге шағымдануда Павлодар мұнай химия зауытын тексеру не көрсетті

Павлодар мұнай-химия зауыты автокөлік бензинінің арбитраж сынамаларына жүргізілген сынақ нәтижесін алды, деп хабарлайды Tengri Auto.

Сынақ 25 тамызда тәуелсіз зертханада өткізілді. Талдау қорытындысы бойынша бензин үлгілері 32513 мемлекеттік стандарты талаптарына және Кеден одағының техникалық регламентіне сәйкестігін растады.

Компания бұл жерде зауыттан жөнелтілген бензин партиялары туралы сөз болып отырғанын атап өтті.

Арбитраж сынама мұнай өнімдерінің әрбір партиясынан алынады. Ол зауыт аумағындағы SGS тәуелсіз зертханасында талданып, үлгіге мөр басылады және 45 тәулік бойы сақталады.

Мұндай сынама мұнай өнімінің сапасына қатысты дау туындаған жағдайда пайдаланылады.

Бұған дейін Энергетика министрі Ерлан Ақкенженов қазақстандықтардың бензин сапасына қатысты шағымдарына жауап берген болатын.

"Расында қазір әлеуметтік желілерде бұл тақырып өткір көтеріліп жатыр. Кеше менің орынбасарым, вице-министр Техникалық реттеу және метрология комитеті төрағасының орынбасарымен бірге Павлодарға жіберілді. Олар қазір Павлодар зауытын отын сапасы бойынша заңбұзушылықтардың бар-жоғына қатысты тексеріп жатыр", - деді Ақкенженов.

Сондай-ақ Ақкенженов бензиннің жаңа партиясы Атырау мұнай өңдеу зауытынан келеді деп күтіліп отырғанын хабарлады.

Google News арқылы жаңалықтарымызды қадағалаңыз