Қазақстандықтар Мысырда демалғысы келді, бірақ қиындықтарға тап болды

Адамдар демалысын жоспарлап, қонақүй брондап, билет сатып алған. Алайда бір бөлігі сапарға шыға алмай қалса, енді бірі қиындықтарға шетелде жүргенде тап болған. Қазір Қазақстанның түрлі қаласынан 30-ға жуық отбасы турға төлеген ақшасын қайтаруға және өздері сеніп артқан турагентке не болғанын анықтауға тырысып жатыр, деп хабарлайды Tengri Travel.

15 адамнан тұратын отбасының Мысырға сапары келеңсіздікпен аяқталды

Редакциямыздың WhatsApp нөміріне SuperTour (NS Travel ЖШС) агенттігінен туристік жолдама сатып алған қазақстандықтар хабарласты. Отбасылар бірінің айтуынша, мәселе сапар басталмай жатып туындаған.

Отбасы Мысырға 29 маусымда ұшуы керек еді. Сапарға аз уақыт қалғанда ұшақ билеттері жоқ екені анықталды. Клиенттерге басқа нұсқа - келесі күні Шымкенттен ұшу ұсынылған.

"2026 жылдың мамырында біз Supertour туристік агенттігінің өкілі Д.У.-дан 29 маусымда Мысырға ұшатын тур сатып алдық. Тура сапар алдында әуе билеттері жоқ екені белгілі болды. Бізге 30 маусымда Шымкент арқылы балама ұшу нұсқасы ұсынылды, біз келістік", - дейді тур сатып алушылардың бірі.

Алайда Мысырға ұшып барғаннан кейін туристер төленген қызметтердің бір бөлігі жоқ екенін байқаған.

"Мысырға барған соң, төленген қызметтер жоқ екені белгілі болды: трансфер, қонақүй және сақтандыру жасалмаған. Біз сапар барысында тұру ақысын өз бетімізше төлеп, орналасу және қайту билеттеріне қатысты мәселелерді өзіміз шешуге мәжбүр болдық", - деп бөлісті қазақстандықтар.

Оралғаннан кейін туристер бұл жағдайды турагентпен шешпек болған. Олардың айтуынша, Д. У. шығындарды өтеуге уәде берген көрінеді. Кейін тараптар ақшаны қайтару туралы келісімге қол қойған.

"7 шілдеде қайтып келгеннен кейін Д. шығындарымызды өтеуге уәде берді, бірақ ақша қайтарылмады. Кейін бізге оның заңгері хабарласып, қаражатты үш траншпен қайтару туралы ресми келісімге қол қойылды", - деп атап өтті олар.

3,5 миллион теңгенің туры өтпей қалды

Тағы бір зардап шегуші - алматылық Сатурин. Ол өз отбасының бірнеше мүшесіне Шарм-эль-Шейхке тур сатып алғанын айтты. Сапарға бес адам аттануы керек еді, жолдамалар құны шамамен 3,5 миллион теңге болды.

"Мен зардап шеккендердің бірімін. Бес адам - мен, әйелім, үлкен қызым мен күйеу балам баруымыз керек еді. Біз бірігіп, екі отбасына екі тур сатып алдық", - дейді ол.

Сатуриннің айтуынша, ұшу 9 тамызға жоспарланған, бірақ тур тоқтатылған.

"Ол соңғы сәтке дейін турмен айналысып жатқанын айтып, күтуімізді өтінді. Соңында сапар болған жоқ, ал ақшамыз әлі қайтарылмады", - деді ол.

Клиенттердің арасында бірден 15 адамға тур сатып алған үлкен отбасы да болған.

"Бізге дейін тағы бір отбасы - шамамен 15 адам болды. Олар да үлкен тур сатып алған", - деді Сатурин.

Зардап шеккендер турды да, өтемақыны да ала алмады. Алматылық тұрғынның айтуынша, бүкіл отбасы жоспарлаған сапар болмай қалды.

Қанша адам зардап шекті?

Ұқсас оқиғалар көбейген соң, тур сатып алушылар ортақ чат ашқан. Оған Қазақстанның әртүрлі қаласынан адамдар қосылды.

Сатуриннің айтуынша, қазір чатта 30-ға жуық отбасы бар. Олар турға ақша төлегендерін, бірақ сапар алдында немесе ақшаны қайтару кезінде қиындықтарға тап болғандарын айтады.

Мәселені өз бетінше шешу мүмкін еместігін түсінген қазақстандықтар құқық қорғау органдарына жүгіне бастады. Олар прокуратураға, сондай-ақ Алматы мен Есік полиция департаменттеріне арыз түсірді.

Есікте жүгіну себебі - қаражат Есікте тіркелген NS Travel ЖШС шотына аударылған.

Туризм индустриясы комитеті не дейді?

Біз Туризм индустриясы комитетіне сауал жолдадық. Онда NS Travel ЖШС қызметін 2025 жылдың шілдесінде бастағанын және турагенттер тізілімінде бар екенін хабарлады.

"Рұқсаттар мен хабарламалар мемлекеттік электрондық тізілімінің деректеріне сәйкес, NS Travel ЖШС 15.07.2025 жылы қызметтің басталғаны туралы хабарлама негізінде турагент ретінде тіркелген", - деп атап өтті комитет өкілдері.

Ведомство аталған турагенттің адал еместігі туралы шағымдар түскенін растады.

"Кейінгі уақытта комитетке аталған компанияға қатысты бірнеше шағым түсті. Алаяқтық белгілеріне қатысты хаттар түскен жағдайда, тиісті шаралар қабылдау үшін заңнамада белгіленген тәртіппен Ішкі істер министрлігіне жолданады", - деп хабарлады комитет.

"Қазақстан Республикасындағы туристік қызмет туралы" заңға сәйкес, туристік қызмет туралы заңнаманың сақталуын бақылау жергілікті атқарушы органдардың - бұл жағдайда Алматы туризм басқармасының құзыретіне кіреді.

"Комитеттің туристік қызмет туралы Қазақстан Республикасы заңнамасының сақталуына мемлекеттік бақылау жүргізуге, соның ішінде кәсіпкерлік субъектілеріне тексеру жүргізуге өкілеттігі жоқ. Осыған байланысты, комитет бұған дейін "NS Travel" ЖШС-нің қызметін қарастыру бойынша құзыретіне сәйкес жергілікті атқарушы органға – Алматының туризм басқармасына өтініш жолдады", - деп атап өтті ведомство.

Сонымен қатар азаматтардың шағымдарынан кейін комитет компания мен оның басшыларына қатысты шара қолдану үшін Ішкі істер министрлігіне ақпарат жіберді.

Туристерге ақшасы "Туристік Қамқор" арқылы қайтарыла ма?

Сондай-ақ біз Туризм комитетінен зардап шеккендер "Туристік Қамқор" шығу туризмі саласындағы азаматтардың құқықтарына кепілдік беру жүйесі көмегіне сүйене ала ма, жоқ па, соны білдік.

Ведомство "NS Travel" ЖШС расында шығу туризмі саласында турагент ретінде жұмыс істейтінін, бірақ "Туристік Қамқор" жүйесіне қатысушы емес екенін түсіндірді.

""NS Travel" ЖШС (...) шығу туризмі саласында турагент ретінде қызметін жүзеге асыратын субъектілерге жатады, бірақ заң талаптарына сәйкес шығу туризмі саласындағы Қазақстан азаматтарының құқықтарына кепілдік беру жүйесінің қатысушысы емес", - деп хабарлады ведомство.

Бұл ретте, комитет жүйе арқылы қорғау мүмкіндігі нақты туристік өнімге және туркодтың болуына байланысты екенін атап өтті.

"Туркодтың болуы әрбір нақты туристік өнімге қатысты анықталады және бұл Қазақстан азаматтарының құқықтарын қорғау тетіктерін қолданудың бір шарты", - деп түсіндірді олар.

Сонымен қатар "Туристік Қамқор" жүйесі туристердің кез келген шығынын автоматты түрде өтеуге арналмаған. Комитет мәліметінше, осы іс бойынша туристерге қатысты қорғау шараларын қолдану туралы шешім әзірге қабылданған жоқ.

Полиция не деді?

Біз Алматы полиция департаментіне де сауал жолдадық. Полиция сотқа дейінгі тергеу амалдары жүріп жатқанын, ал күдікті ұсталып, уақытша ұстау изоляторына қамалғанын хабарлады.

"Бұл дерек бойынша Бостандық аудандық полиция басқармасы қылмыстық іс қозғады ("сотқа дейінгі тергеп-тексеру басталды" – ред. еск.). Күдікті ұсталып, уақытша ұстау изоляторына қамалды", - деді ПД өкілдері.

ПД қазіргі уақытта тергеушілер оқиғаның мән-жайын анықтау үшін қажетті шараларды жүргізіп жатқанын атап өтті.

Тергеу қорытындысы бойынша процессуалдық шешім қабылданады.

Алматы прокуратурасы не деді?

Алматы прокуратурасы қылмыстық іс "Алаяқтық" бабы бойынша қозғалғанын нақтылады.

"Қала прокуратурасы Д.О.Өнербаеваға қатысты қылмыстық істің бар-жоғы туралы мәлімет беру жөніндегі сауалды қарады. Бостандық аудандық ПБ азаматтардың арызы бойынша алаяқтық дерегіне қатысты тергеу жүргізіп жатқаны анықталды", - деп хабарлады прокуратура.

Ведомство тергеу жалғасып жатқанын атап өтті. Істің мән-жайы әзірге жарияланбайды, себебі заң сотқа дейінгі тергеп-тексеру деректерін жария етуге тыйым салады.

Мұндай жағдайлар Қазақстанда бірінші рет болып отырған жоқ. Қазақстандықтар туристік жолдамаларды сатып алу кезінде жиі қиындықтарға тап болады - уәде етілген сапарлар өтпей қалады, ал ақшаны қайтару оңайға соқпайды.

Біз туристік агенттікке оқиғаға қатысты түсініктеме алу үшін хабарластық, бірақ материал жарияланған сәтте жауап ала алмадық.

Бізді Google-дың негізгі дереккөздер тізіміне қосыңыз

Қосу