ҰҚК Жаңаөзеннің экс әкіміне қатысты тергеуді растады

Ұлттық қауіпсіздік комитеті Жаңаөзен қаласының бұрынғы әкімі Жансейіт Қайнарбаевқа қатысты тергеу басталғаны туралы ақпаратты растады, деп хабарлайды Tengrinews.kz тілшісі.

Жаңаөзеннің экс-әкіміне қатысты іс туралы не белгілі?

Қайнарбаев ұсталғаны туралы ақпарат Kozachkov offside Telegram арнасында жарияланды. Жазбада айтылған мәлімет бойынша қылмыстық іс бір топ адамның алдын ала сөз байласуы арқылы адам ұрлау дерегі бойынша тергеліп жатыр.

Tengrinews.kz редакциясы Ұлттық қауіпсіздік комитетінің баспасөз қызметіне хабарласты. Ведомство соталды тергеу жүріп жатқанын растады, бірақ оқиғаның егжей-тегжейін ашудан бас тартты.

"Соталды тергеу жүргізіліп жатыр. Қылмыстық-процестік кодекстің 201-бабы 1-бөлігіне сәйкес өзге ақпарат жария етілмейді", - деді ҰҚК өкілдері.

Жансейіт Қайнарбаев 1984 жылы 20 мамырда Маңғыстау облысы Қарақия ауданы Құланды ауылында дүниеге келген. Екі жоғары білімі бар, Ш.Есенов атындағы Каспий мемлекеттік технологиялар және инжиниринг университетін тау-кен инженері және экономика мамандықтары бойынша бітірген.

Еңбек жолын 2006 жылы жеке секторда бастап, 2012 жылға дейін түрлі ЖШС-да шебер, бас механиктің орынбасары, директор қызметін атқарды.

2012-2014 жылдар аралығында - Жаңаөзен қаласындағы "Тазалық" МКК бөлім бастығы.

2014-2015 жылдары - "Коммуналдық қызмет" МКК директоры.

2015-2016 жылдары - Түпқараған аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы.

2016-2022 жылдары - Маңғыстау облысы Түпқараған ауданы әкімінің орынбасары.

2022-2024 жылдары - Жаңаөзен қаласы әкімінің орынбасары.

2024 жылғы 12 ақпаннан бастап 2026 жылғы қыркүйекке дейін Жаңаөзен қаласының әкімі қызметін атқарды.

2026 жылы қыркүйекте Маңғыстау облысы Қарақия ауданының әкімі болып тағайындалды.

Бізді Google-дың негізгі дереккөздер тізіміне қосыңыз