Қазақстандықтар тегін сринингтен өте алады

Қазақстандықтар енді онкоскринингтен ақысыз өте алады. Бұл қызмет түрі кепілдендірілген тегін медициналық көмек пакеті аясында қолжетімді болады.

Бұған дейін тексерілу үшін МӘМС талап етілетін. Енді сақтандырылмаған азаматтар да дәрігер көмегіне жүгіне алады. 

Жаңа ереже биыл күшіне енді. Бұдан былай артериялы гипертония мен жүрек ауруын, қант диабетін, глаукома, сүт безі обырын ерте анықтау үшін 40-тан 76 жасқа дейінгі тұрғындар тексерілуі қажет. Жатыр мойнының қатерлі ісігі бойынша 30-дан 74 жасқа дейінгілер қаралады. Тоқ ішек обыры мен ми-қан айналымы бұзылыстарын ерте анықтау үшін 50-ден 76 жасқа дейінгі азаматтар тексеріледі. Сонымен қатар В және С вирустық гепатиті бойынша медициналық қызметкерлер, жүкті әйелдер, операция жасататын және басқа да бірқатар науқастар профилактикалық шаралармен қамтылады. Скринингтен өту үшін әр адам тұрғылықты мекенжайы бойынша тіркелген емханахаға баруы қажет.

Әсел Қыдыралиева, ҚР Денсаулық сақтау министрлігінің ресми өкілі:

- Скринингтік тексеру кезінде қандай да бір қабыну процесі, болмаса сол тіннің құрылымдық өзгерісі байқалған аурулар тізбесі бар. Мысалы, диспласия медицина тілінде айтқанда эрозия деген секілді аурулар анықталған жағдайда бұл пациенттерде қатерлі ісік жоқ, осымен болды деген сөз емес. Мұндай пациенттер емхана қызметкерлерінің жіті бақылауында болады.

Себебі бұл ауралардың қатерлі ісікке әкелу қаупі жоғары. Сондықтан қосымша тексерістер тағайындалады. Қажет болған жағдайда қажетті ем көрсетіледі.

Вячеслав Локшин, ҚР ҰҒА академигі, профессор, Қазақстан репродуктивтік медицина қауымдастығының президенті:

- Адам дер кезінде тексерілсе, оған уақытылы көмек көрсетіледі. Ауру да ушықпайды. Яғни онкологиялық, жүрек-қан тамыры, қант диабеті сынды дерттерді ертерек анықтауға мүмкіндік болады. Олардың алдын алу арқылы емдеуге кететін уақыт пен қаражатты үнемдейміз. Азаматтардың басын қатерге тігіп, хирургиялық операциялар жасамаймыз.

Міндетті әлеуметтік сақтандыру заңына енген өзгеріс нәтижесінде жыл сайын 300 мың азаматты скринингтен өткізу мүмкіндігі пайда болмақ. Осылайша, қауіпті дерттің алдын алып, қайғылы жағдайларды азайту көзделген.

Авторы: Серік Селеубайұлы