Қажетті ұсыныстар айтылды

Qazaq24.com, Egemen.KZ дереккөзінен алынған мәліметтерге сүйене отырып ақпарат жариялайды..

Мәжіліс депутаттарының өңірлерге жоспарланған жұмыс сапарлары әлі жалғасын тауып келеді. Бұл жолы депутаттар Абай, Қарағанды, Батыс Қазақстан, Ұлытау облыстары мен Алматы және Шымкент қалаларында болып, жергілікті жұртшылықпен кездесті.

Сурет: turkystan.kz

Мәжіліс депутаты, «Amanat» партиясы фракциясының мүшесі Нұртай Сабильянов Үржар ауданына жұмыс сапары барысында әлеуметтік және инфрақұрылымдық жобалардың іске асырылу барысымен танысты, шалғайдағы елді мекендердің тұрғындарымен кездесті.

Депутат алдымен Лайбұлақ ауылындағы медициналық пунктке барып, одан кейін 2 700-ге жуық адам тұратын Таскескен ауылындағы спорт модулінің жұмысымен танысты.

Жұмыс сапарының соңында депутат Таскескен, Лайбұлақ, Алтыншоқы және Жаңатілек ауылдарының тұрғындарымен кездесулер өткізді. Н.Сабильянов кездесуде ауылдың дамуы Мемлекет басшысы белгілеген негізгі міндеттердің бірі екенін атап өтті.

Қарағанды облысына барған Мәжіліс депутаттары, «Amanat» партиясы фракциясының мүшелері Бауыржан Смағұлов, Асхат Аймағамбетов, Тілектес Адамбеков, Құдайберген Бексұлтанов, Арман Қалықов, Үнзила Шапақ және Никита Шаталов Саран қаласының индустриалды аймағында болат түзу тігісті құбырлар шығаратын TEMPO Kazakhstan зауытының іске қосылу барысымен танысты. Кәсіпорын тұрғын үй-коммуналдық шаруашылыққа, құрылысқа және жылу желілеріне арналған құбыр түрлерін шығаруды көздепті. Қазірдің өзінде қосу жұмыстары жүргізіліп, тиісті келісімшартқа сәйкес құбыр түрлері өндіріле бастаған. Ал толық өндіріс циклінің алғашқы кезеңін алдағы мамыр айында іске қосу жоспарланған. Артынша өнім желісі кезең-кезеңімен кеңейе бермек. Мәжіліс депутаты Бауыржан Смағұлов атап өткендей, мұндай өндірісті іске қосу тек өңір үшін ғана емес, бүкіл ел үшін стратегиялық маңызға ие.

Батыс Қазақстан облысында болған Мәжіліс депутаты, «Amanat» фракциясының мүшесі Снежанна Имашева Орал қаласында Batys Hub инновациялық орталығының ұжымымен кездесіп, цифрландырудың өңірдің дамуына тигізер ықпалын талқылады. Кездесу барысында депутат орталықтың қызметімен жан-жақты танысып, цифрландырудың өңір дамуына тигізер ықпалына ерекше тоқталды. Ол Batys Hub базасында жүзеге асырылып жатқан жобалардың аймақ экономикасын әртараптандыруға, жастардың заманауи цифрлық дағдыларды меңгеруіне және инновациялық бастамалардың кеңінен қолдау табуына ықпал ететінін атап өтті.

Мәжіліс депутаты, Қазақстан Халық партиясы фракциясының мүшесі Ислам Сұңқар өңірлерге жұмыс сапары аясында Шымкент қаласына ат басын бұрып, М.Әуезов атындағы Оңтүстік Қазақстан зерттеу университетіне барды. Университеттің профессор-оқытушылар құрамымен және студенттерімен ашық форматта өткен кездесуде жоғары білім беру мен ғылым саласындағы өзекті мәселелер жан-жақты талқыланды. Университет ұжымы мен білім алушылар Мәжіліс депутатына өздерін толғандырған сұрақтарын қойып, жоғары білім беру жүйесін жетілдіруге бағытталған нақты ұсыныстарын ортаға салды.

Мәжіліс депутаттарының Жезқазған тұрғындарымен кездесуінде балалар спортын қолдау мәселелері сөз болды. «Amanat» партиясы фракциясының мүшелері Ерболат Сатыбалды мен Аманжол Әлтай Жезқазған қаласындағы заманауи CK-NAMYS спорт академиясына барып, жас спортшыларды даярлау барысымен танысты. «CK-NAMYS» спорт академиясы «Amanat» партиясының сайлауалды бағдарламасы аясында салынғанын атап өткен жөн. Жобаға шамамен 4 млрд теңге инвестиция салынды. 10–16 жас аралығындағы 200-ге жуық баланы даярлауға арналған академияда қазіргі таңда 152 жас спортшы білім алып жатыр.

Мәжіліс депутаттары, «Amanat» партиясы фракциясының мүшелері Айгүл Құспан, Сергей Пономарев және Айдос Сарым Алматы қаласының тұрғындарымен кездесіп, мегаполистегі бірқатар ұйымдар мен мекемелерді, оның ішінде әлеуметтік инфрақұрылым және мәдениет нысандарын аралады. Азаматтарды жеке қабылдау барысында Мәжіліс депутаты Айдос Сарым тұрғындардың өтініш-тілектерін тыңдап, бірқатар мәселелер бойынша қолданыстағы заңнама аясында түсіндірмелер берді. Ал кейбір өтініштер қосымша зерделеу үшін жұмысқа алынды.

Мәжіліс депутаты Сергей Пономарев Алматыдағы Мұхтар Әуезов атындағы Мемлекеттік академиялық драма театрының ғимаратына, ал Айгүл Құспан Алматы облысында орналасқан Ұлттық қауіпсіздік комитеті Шекара қызметінің техникалық және кәсіптік білім беру бөлімшесіне барды.

Сонымен қатар депутаттар Наурызбай ауданындағы Шұғыла шағын ауданында салынып жатқан II типті өрт сөндіру депосының құрылысымен танысты. Бұл нысан «Amanat» партиясының сайлауалды бағдарламасы аясында жүзеге асырылып жатыр.

Соңғы жаңалықтар