ҚазМұнайГаздың басқару кеңесінде тек қазақстандық мамандар қалды

ҚазМұнайГаз» (ҚМГ) ұлттық компаниясының Директорлар кеңесі құрамында шетелдік мамандар мүлдем қалмады. Директорлар кеңесіндегі соңғы экспат болған Филип Холланд өз бастамасымен қызметінен мерзімінен бұрын кетті, деп хабарлайды «Нефть и газ Казахстана» Telegram-арнасы.

Айта кетерлігі, бұл отставка 2026 жылғы 14 тамызда — акционерлердің кезектен тыс жалпы жиналысы Холландты жаңа үш жылдық мерзімге тәуелсіз директор ретінде Директорлар кеңесінің құрамына қайта сайлағаннан кейін тура бір күннен соң орын алды. Топ-менеджердің бір түнде өз шешімін өзгертуіне не түрткі болғаны туралы ресми себептер жарияланған жоқ.

Осы ретте ҚМГ-да жоғары басқару буынына шетелдік кадрларды тартудың көпжылдық дәуірі іс жүзінде аяқталды. Экспаттарды белсенді түрде тарту 2014 жылы Нидерланды азаматы Фрэнк Куилаарстың Директорлар кеңесінің басшысы лауазымына келуімен басталған еді. Әр жылдары шетелдік мамандар бас компанияда ғана емес, сонымен бірге оның «ӨН ҚазМұнайГаз» және Өндіру және бұрғылау технологиялары ғылыми-зерттеу институты сияқты ірі еншілес құрылымдарында да түйінді позицияларды иеленді.

Дегенмен, шетелдік топ-менеджерлерді шақыру тәжірибесі талай рет қызу талқылауларға арқау болған еді:

Жоғары шығындар: 2019 жылы Директорлар кеңесінің шетелдік мүшесінің базалық сыйақысы жылына шамамен $150 мыңды құрады, ал комитеттерге басшылық етуді және отырыстарға қатысуды есепке алғанда, бөлек басшыларға төленетін төлем (мысалы, Кристофер Уолтонға) $370 мыңға дейін жеткен.

Біліктілікке қатысты күмәндар мен мүдделер қақтығысы: Кейбір тағайындалған тұлғалардың мұнай-газ секторында терең тәжірибесі болмаған (тіпті ӘСК мен қорғаныс ведомстволарының құрылымдарында жұмыс істеген бэкграунды барлар болды) немесе ұлттық компанияның қаражаты орналастырылған коммерциялық банктерде қатар лауазымдарды атқарған.

Қазір «ҚазМұнайГаз» IPO процедурасын сәтті өткізіп, өзіндік корпоративтік басқару жүйесін қалыптастырды және отандық кадрлық резервті тәрбиелеп шығарды. Шетелдік тәуелсіз директорлар қатарындағы соңғы тұлғаның қызметтен кетуі шетелдік паспорт халықаралық сараптаманың міндетті шарты ретінде қарастырылған кезеңге толықтай нүкте қойды.

Кеше, 10:15