Қоқыс үйінділерін тек қағаз жүзінде жойған әкімдер жазаланды

АСТАНА, 15 қазан – Sputnik. Ақмола облысы Зеренді аудандық прокуратурасы "Таза Қазақстан" экологиялық акциясын іске асыру барысына уәкілетті органдардың қызметі талдау жүргізді.

"Қазақстан Ғарыш Сапары" геопорталы арқылы жүргізілген мониторинг нәтижесінде Зеренді ауданында рұқсат етілмеген 128 қоқыс тастау орны анықталған. Алайда, ауылдық округтердің әкімдіктері олардың толықтай жойылғаны туралы есеп берген.

"Бірақ координаттар бойынша жүргізілген тексеріс нәтижесінде қоқыс үйінділері іс жүзінде жойылмағаны, жұмыстардың тек қағаз жүзінде орындалғаны анықталды", - деп жазылған хабарламада.

Қадағалау актілерінің нәтижесі бойынша Зеренді ауданының 17 ауылдық округі әкімі әкімшілік жауаптылыққа тартылды.

Рұқсат етілмеген қоқыс үйінділерін тазалау жұмыстары жүргізіліп, барлығы 5810 м³ көлемінде қалдықтар шығарылды.

Прокуратура хабарлауынша, Зеренді ауданында тұрмыстық қатты қалдықтарға арналған заңдастырылған полигондар жоқ, барлық қалдық жергілікті атқарушы органдар белгілеген, экологиялық талаптар мен санитарлық нормаларға сай келмейтін алаңдарға төгіледі.