Қорғаныс министрлігінде қаза тапқан сарбаздардың аналарымен өткен кездесудің нәтижесі туралы айтылды

Қорғаныс министрінің орынбасары Қаныш Әубәкіров 2025 жылдың 10 желтоқсанында Мәжіліс кулуарында қаза тапқан сарбаздардың аналарымен өткен кездесу жайлы баяндады, деп хабарлайды Arasha.kz. Ол Қорғаныс министрлігі сарбаздардың қазасы мәселесіне айрықша мән беретінін атап өтті.

«Біз Қорғаныс министрлігінде сарбаздарымыздың аналарына үлкен құрметпен қараймыз. Әрбір өлім – біз үшін өте ауыр. Командир – сарбаздың әкесі іспетті, сондықтан бұл жағдайды қатты қабылдаймыз. Қазір де жұмыс жалғасып жатыр. Әскери бөлімдердегі командирлер, ұжымның өзі – бәрі жоғалтқан отбасыларға көңіл бөліп, қолдау көрсетіп келеді. Бұл – тек отбасы үшін емес, біз үшін де ауыр қаза», – деді Әубәкіров.

Қаза тапқан сарбаздардың аналарымен келіссөздер немен аяқталды деген сұраққа ол былай жауап берді:

«Әрбір анамен жеке сөйлестік. Жұмыс тек біздің тарапымыздан ғана емес, барлық мемлекеттік органдармен бірлесе жүргізіліп жатыр».

Ведомствоның ресми өкілі Руслан Жаңғұлин қазіргі уақытта барлық факті бойынша прокуратура тексеріс жүргізіп жатқанын және кейін құқықтық баға беретінін қосты.