Қостанай облысында көші қон квотасы толық игерілді

2025 жылы Қостанай облысына оңтүстік аймақтардан 500-ден аса адам көшіп келген. Біразы Меңдіқара ауданының Боровской ауылында тұрып жатыр.

Жауапты мамандардың айтуынша,  қоныс аударушылар бағдарламасына қатысушының  барлығына тиісті  көмек толық берілген. Түстіктен теріскейге қоныс аударғандардың тұрмыс жағдайымен танысып қайтқан тілшіміздің репортажы.

Айдос Қостанай  Қызылорда облысы Қазалы ауданының тумасы. Өткен ғасырда көшіп-қонып жүргенде атасы Тобыл өңірінде дүниеге келіпті. Содан Қостанай деген есім берілген екен. Сол Қостанайдың немересі төрт жыл бұрын «Еңбек» бағдарламасымен Меңдіқара ауданның Боровской ауылына көшіп келді. Бүгінде мектепте мұғалім, үйленіп, үйлі болды, екі баласы бар.

Айдос, Қостанай ауыл тұрғыны:

- Жоспарым жалпы болашақта осы жақта тұрғылықты қалып, әрі қарай өрісімізді кеңейтсем деген ойым бар. «Жас келсе, іске» деген әрбір қазақтың баласы көшіп келу керек. Жер көру керек, ел көру керек. Бір жағынан мұндай бағдарламаларды мемлекетіміз қолдап жатыр.

Ал Гүлдана Саматқызы Шымкентен Боровскойға былтыр қоныс аударған. Өзі-мұғалім, жұбайы-тіс дәрігері.

Гүлдана Саматқызы, ауыл тұрғыны:

- Бізде халық саны көптігінен яғни дәрігер, стамотологтар өте көп, ал мұнда тапшы болғандықтан, осында келдік. Жалақы жағынан бізді қанағаттандырады. Жұмыс табу жағынан біз ешқандай қиындық көрген жоқпыз. Қазір бізді үймен қамтамасыз етіп жатыр.

Қостанай облысына 2025 жылы ерікті қоныс аударушыларға 535 квота бөлінді. Ол толық игерілді. Көшіп келген отбасының әр мүшесіне 70 АЕК көлемінде бір реттік демеуқаржы берілген. Одан бөлек, үй сатып алуға немесе  жалдауға қаралған қаржы тағы бар.

Мәриям Әбдіраш,  Жұмыспен қамтуды үйлестіру және әлеуметтік бағдарламалар басқармасы бөлімінің бас маманы:

- Бүгінде таңда 43 отбасы ұтқырлық сертификтын алып, баспана сатып алған. Ерікті түрде қоныс аударушылар бағдарламасына жастар да қатыса алады, яғни «Мәңгілік ел жастары – индустрияға» немесе «Серпін» жастар» бар. Колледжде оқып жатқан, керекті мамандық иелері осы бағдарламаға қатыса алады. Соларға сондай көмек беріледі.

Оңтүстіктен Қостанай облысына көшіп келгендер түрлі салада еңбек етеді. Жеке кәсібін ашып, нәсібін тауып отырғандар да бар. Нақты айтсақ былтыр қоныс аударғандардың ішінде 11 адам кәсіпкер ретінде тіркелген.

Авторлары: Мағауия Қалиев, Сергей Трахтенберг