ҚПЛ: Тобыл үшінші мәрте жеңіліске ұшырады

Бұл турдағы ойындар 4 және 5 сәуір күндеріне белгіленген. Бүгін, 4 сәуірде төрт кездесу өткізілсе, 5 сәуірде төрт ойын болады.

Алдымен «Ертіс» (Павлодар) мен «Алтай» (Өскемен) командалары жасыл алаңға шықты. Өткен жылы бірінші лигада топ жарып, биыл Премьер-лигада сынға түсуге мүмкіндік алған командалар алғашқы минуттан шабуылға шықты. Десе де кездесу тағдырын шешкен жалғыз голды павлодарлық клубтан Юши Шимамура 36-минутта өзінің еншісіне жазды.

Осылайша «Ертіс» қарсыласынан 1:0 есебімен басым түсті.

Сондай-ақ қазір «Елімай» (Семей) мен «Тобыл» (Қостанай) кездесуінің нәтижесі белгілі болды. Қос команда алдағы маусымда үздіктер қатарынан көрінуді қалайды. Сондықтан олар алғашқы минуттан алға қарай ұмтылды. Ойынның 75-минутында семейлік клубтан Роман Мұртазаев соққан гол кездесу тағдырын шешті.

Бұл ойында «Елімай» қарсыласынан 1:0 есебімен басым түсті.

Алғашқы ойын күнінде «Қайсар» (Қызылорда) мен «Қызылжар» (Петропавл) 0:0 есебіне қанағат білдірсе, «Ордабасы» (Шымкент) мен «Атырау» 1:1 есебін тіркеді.

Ертең, 5 сәуірде төртінші турдың ойындары жалғасады. Алдымен 15:00-де «Ұлытау» (Жезқазған) - «Ақтөбе», «Каспий» (Ақтау) - «Жетісу» (Талдықорған), 18:00-де «Қайрат» (Алматы) - «Астана», 19:00-де «Жеңіс» (Астана) - «Оқжетпес» (Көкшетау) кездеседі.

Үшінші турдан кейін алғашқы төрт орындағы «Астана», «Ордабасы», «Оқжетпес», «Қайрат», командаларының жеті ұпайы бар.

Еске салсақ, бұдан бұрын футболдан Бірінші лига командалары арасындағы Қазақстан чемпионатының бірінші туры мәресіне жетті.