​Құлсарыда жасөспірім бала қаза болған жол көлік оқиғасы бойынша автобус жүргізушісі сотталды

Атырау облысы Жылыой аудандық сотында кәмелетке толмаған жасөспірім мотоцикл жүргізушісі қаза тапқан жол-көлік оқиғасына қатысты іс бойынша үкім шықты. Автобус жүргізушісі ҚК-тің 345-бабының 3-бөлігі бойынша - абайсызда адам өліміне әкеп соққан жол қозғалысы ережелерін бұзғаны үшін кінәлі деп танылды.

Сот материалы бойынша 2025 жылғы 7 шілдеде Құлсары қаласында автобус жүргізушісі О. көше қиылысында жол жиегіндегі жол белгісін елемей, кәмелетке толмаған Б.-ның басқаруындағы мотоциклмен соқтығысып, жол-көлік оқиғасын жасаған. Нәтижесінде кәмелетке толмаған Б. есін жимастан ауруханада қаза болған.

Прокурор сотталушыға 5 жыл мерзімге көлік құралдарын басқару құқығынан айыра отырып, 2 жыл 6 ай мерзімге бас бостандығынан айыру жазасын тағайындауды сұрады. Жәбірленуші өкілі заң талаптарына сәйкес жаза тағайындауды сұрады. Сотталушы өз кінәсін мойындамады.

Сот аталған қылмыс онша ауыр емес қылмыс, абайсызда жасалған әрекеттер санатына жатады және 5 жылға дейін бас бостандығынан айыру жазасы қарастырылғанын ескерді. Сонымен қатар сотталушының асырауында жас балаларының болуы, бұрын сотталмағаны – жаза мен қылмыстық жауапкершілікті жеңілдететін мән-жайлар ретінде танылды. Ауырлататын мән-жайлар анықталмады.

Мұндай жағдайларда, ҚК-тің 55-бабының 2-бөлігінің 1) тармағына сәйкес, жаза тағайындау барысында мерзім осы баптың санкциясында көзделген ең жоғары мерзімнің жартысынан аспауға тиіс, яғни 2 жыл 6 ай.

Сот үкімі бойынша, сотталушы ҚК-тің 345-бабының 3-бөлігімен кінәлі деп танылып, оған 5 жыл мерзімге көлік құралдарын басқару құқығынан айыра отырып, 2 жыл 6 ай мерзімге бас бостандығынан айыру жазасы тағайындалды.

Сот үкімі заңды күшіне енген жоқ.

Бүгін, 18:02