Құрылыс кезеңдерін қамтитын портал іске қосылады

Кейінгі жылдары құрылыс саласы қарқын алды. Былтыр елде 19,1 млн шаршы метр баспана салынды.

Бұл - бұрын соңды болмаған рекорд. Санмен қоса сапаны да арттыруға ден қойылды. Бүгінде заңнамаға өзгертулер енгізіліп, саланы кешенді реформалау іске асуда.

Осылайша, баспанаға зәру жандардың мәселесі біртіндеп шешіліп келеді.

Құрылыс саласы экономиканың негізгі драйверлерінің бірі. Елдің жалпы ішкі өніміндегі үлесі де басым. Салада қомақты жетістіктер бар. Соңғы жылдары бұрын-соңды болмаған нәтижелерге қол жеткіздік. Белгіленген меже артығымен орындалды. Мәселен, 2023 жылғы жоспардағы 15 млн-ның орнына 17,8 млн шаршы метр тұрғын үй пайдалануға берілді. Былтырғы көрсеткіш 19,1 миллион шаршы метр. Ал биылғы 11 айда 15,7-нің орнына, тұрғындар 16,9 млн шаршы метрдің игілігін көрді.

2029 жылға дейін 111 млн шаршы метр

2023 жылы 15,3 млн шаршы метр – 17,8 млн шаршы метр

2024 жылы 15,5 млн шаршы метр – 19,1 млн шаршы метр

2025 жылы 15,7 млн шаршы метр – 16,9 млн шаршы метр  

Қанат Мыңбаев, ҚР ӨҚМ Құрылыс және тұрғын үй-коммуналдық шаруашылық істері комитеті төрағасының орынбасары:

- 2024 жылды алатын болсақ, еліміз егемендік алғалы бері жоғары көрсеткіш көрсеткен. Жоспар бойынша 18 млн болса, біз қаражаттың барлық түрін қоса алғанда 19,1 млн шаршы метр тұрғын үй тапсырылды. Алдағы жылда бізде меже 19,2 млн шаршы метр.

Миллиондаған шаршы метрде баспаналар бой көтерді. Сәйкесінше бағдарламалардың саны артып, талабы тұрғындардың көңілінен шығатын ипотекалық несиелер беріліп келеді. Былтыр тұрғын үй саясатын реформалау туралы заң қабылданғалы, жалға берілетін және несиелік баспананы бөлу тетігі қарастырылды.

Қанат Мыңбаев, ҚР ӨҚМ Құрылыс және тұрғын үй-коммуналдық шаруашылық істері комитеті төрағасының орынбасары:

- Жалға берілетін тұрғын үйді бөлу кезінде есепке қою күнімен қатар бірінші кезектегі құқыққа ие азаматтар санаты тізбесіне өзгерістер енгізілді. Бұрын мұндай санаттарға үш санат – Ұлы Отан соғысы ардагерлері , жетім балалар және көпбалалы отбасылар болатын. Бұл санат 8-ге дейін көтерілді. Кімдер қосылды? 1 және 2 топтағы мүгедектігі бар азаматтар, мүгедек балалары бар отбасылар, жетімдер, ҰОС ардагерлеріне теңестірілген ардагерлер және басқа мемлекет аумағындағы қимылдарының ардагерлері, мысалы Ауған соғысына қатысқандар кіреді.

Сала заман талабына сай сандық жүйеге көшіп жатыр. Басымдық барлық процестердің ашықтығын қамтуға беріледі. Келер жылы құрылыс жобасы циклінің негізгі кезеңдерін қамтитын порталды іске қосу көзделді. Ол кадастр мен сараптама секілді маңызды бағыттарды бір жерге топтастыратын платформа болады. Мамандар мұндай жүйені уақытты үнемдеуге мүмкіндік береді, - дейді.

Вячеслав Лазарев, «Қазақстан құрылысшылары одағы» РҚБ Астана қалалық филиалының директоры:

- Өмірімізге заманауи шешімдер мен жасанды интеллект еніп жатыр. Сондықтан ешбір сала сандық жүйеден қалыс қалмайды. Ал түрлі портал мен маңызды жүйелердің іске қосылуы – қағазбастылықтан арылып, саланың жаңа деңгейге көтерілуіне жол ашады деп айта аламыз.

Биылғы жыл құрылыс саласы үшін жақсы қорытындыланды деуге келеді. Бірақ босаңсуға жол жоқ. Алда орындалуға тиіс міндеттер күтіп тұр. Себебі саланың дамуы тұрғындардың жағдайын жақсартуға сеп болады. Сондай-ақ ел экономикасы да тиісінше өркендейді.

Авторлары: Альмира Оразбай, Санжар Биргебаев