Құс шаруашылығы кәсіпорындары тарапынан астыққа деген сұраныс артты

ҚР ауыл шаруашылығы министрлігі баспасөз қызметінің хабарлауынша, ұлттық астық операторының атына ірі құс фабрикаларынан шамамен 200 мың тонна астық сатып алуға өтінімдер келіп түскен.

Ішкі нарықты қамтамасыз ету және өңдеуші сектордың қажеттіліктерін қанағаттандыру мақсатында Азық-түлік келісімшарт корпорациясы астық пен майлы дақылдарды электрондық биржалық сауда тетігі арқылы өткізіп жатыр. 2026 жылғы наурыз айының басынан бері ұн тарту кәсіпорындарына 14,9 мың тонна азық-түліктік бидай жөнелтілді.

Сатылым құрылымында негізгі үлесті ұн өндіру үшін сұранысқа ие, клейковинасы 23%-дан жоғары үшінші сыныпты бидай құрады.

Бидайдың бағасы сапалық сипаттамаларына қарай:
• клейковинасы 23–24% – тоннасына 104 мың теңге;
• клейковинасы 25–26% – тоннасына 109 мың теңге;
• клейковинасы 27–28% – тоннасына 125 мың теңге.

Бұған дейін ұлттық астық операторы астық пен майлы дақылдардың еркін қалдықтарын сатудың басталғаны туралы хабарлаған болатын. Бұл ретте 4–5 сыныпты бидай тек құс және мал шаруашылығы кәсіпорындарының қажеттіліктері үшін ғана өткізіледі, бұл аталған салаларды нысаналы түрде қолдауға мүмкіндік береді.

-Биржалық алаңды пайдалану сауда-саттықтың ашықтығы мен бәсекелестігін қамтамасыз етеді. Азық-түлік келісімшарт корпорациясы азық-түлік қауіпсіздігін қамтамасыз ету және ішкі нарықты астықпен тұрақты қамтамасыз ету бағытындағы жұмысын жалғастырып жатыр,-делінген хабарламада.

Биржадағы сауда сессиялары жұмыс күндері күн сайын сағат 10:00-ден 17:00-ге дейін өтеді. Сауда-саттыққа барлық мүдделі қатысушылар қатыса алады.

Осыған дейін елімізде астық пен ұн экспорты 8,9 млн тоннаға жеткені туралы жаздық.