Қысқы Олимпиаданың басталуына тура 100 күн қалды

Италия тарихта төртінші рет Олимпия ойындарын қабылдайды. Бұл туралы шешім 2019 жылы 24 маусымда ХОК-тың Лозанна қаласындағы 134 — сессиясында қабылданған.

Милан тұңғыш рет Олимпиаданы өткізеді. Ал Кортина-д’Ампеццода 1956 жылы Олимпия ойындары өткен.

Ойындардың ресми белгілері — Тина және Мило. Оның эскизін мектеп оқушылары әзірлеген. Барлығы 1600 дизайн ұсынысы қабылданған.

Олимпиадада 16 спорт түрінен 195 медаль жиынтығы сарапқа салынады. Оған кемінде 3500 спортшы қатысады деп жоспарланған. Спорт түрлеріне биатлон, бобслей, тау шаңғысы, керлинг, конькимен жүгіру спорты, шаңғы жарысы, шаңғы қоссайысы, фристайл, трамплиннен секіру, шана спорты, скелетон, ски-альпинизм, сноуборд, мәнерлеп сырғанау, шайбалы хоккей және шорт-трек кіреді. Олимпия ойындарына алғаш рет ски-альпинизм енгізіледі.

Сайыстар Италияның әртүрлі қалаларыда өтеді. Әр аймақ жарыстарды өткізуге арналған спорт нысандарын ұсынады. 

Қазақстанның Ұлттық Олимпиадалық комитеті 2026 жылғы қысқы Олимпиада ойындарына ресми шақырту алған.

Қазақстандық спортшылар қысқы Олимпиада ойындарына 1994 жылдан бері қатысып келеді. Сол уақыттан бері атлеттер жалпы 8 медаль жеңіп алды: бір алтын, үш күміс және төрт қола.

Еске сала кетейік, қысқы Олимпиада 2030 жылы Францияда, 2034 жылы АҚШ-та өтеді.