Қытай мен Орталық Азия арасында жаңа теміржол жүк бағыты ашылды

Қытай мен Орталық Азия елдері арасында теміржол арқылы жүк тасымалдайтын жаңа бағыт іске қосылды. Бұл туралы Синьхуа агенттігі хабарлады.

Жаңа маршрут Қытайдағы тұрақты жүк пойыздары кестесіне енгізілген. Оның бастапқы нүктесі – Тяньцзинь қаласы. Алғашқы пойыз Қазақстан мен көрші елдерге автокөлік бөлшектері, өндірістік жабдықтар және басқа да тауарларды жеткізу үшін жолға шықты.

Пойыз мемлекеттік шекараны Алашанькоу өткізу бекеті арқылы кесіп өтеді. Сонымен қатар бұған дейін іске қосылған бағыт Қорғас өткізу бекеті арқылы өтетін балама дәлізбен толықтырылады.

Қазіргі уақытта бұл бағыт бойынша Тяньцзиньнен Орталық Азияға аптасына бір рет жүк пойызы қатынайды. Маршрут Алматы, Ташкент және өзге де өңірлерді қамтып, трансшекаралық сауда логистикасын күшейтуге бағытталған.

Сарапшылардың бағалауынша, жаңа дәліз жеткізу тізбектерінің тиімділігін арттырып, Қытай мен Орталық Азия арасындағы сауда айналымын ұлғайтуға ықпал етеді. Алдағы уақытта мұндай құрлықтағы тасымал бағыттары кеңейе түседі деп күтілуде.