Қытайда жолаушылар саны 3,5 млрд тан асты шетелдегі қазақ баспасөзі

Өзбекстанның алтын-валюта резервтері жаңа рекорд тіркеді – ӨзА 

Өзбекстанның алтын-валюта резервтері 2026 жылдың ақпан айына қарай алғаш рет 75 миллиард доллардан асты.

Өзбекстан Республикасының Орталық банкі мәліметіне сәйкес, 2026 жылдың қаңтар айының қорытындысы бойынша елдің халықаралық резервтері 75,08 млрд долларды құраған, деп хабарлайды «ӨзА» ақпарат агенттігі.

Хабарламада айтылғандай, бір ай ішінде резервтер көлемі 8,8 млрд долларға өскен. Осылайша, алтын-валюта резервтері қатарынан алтыншы ай тарихи ең жоғары көрсеткішін жаңартты. Соңғы бір жыл ішінде халықаралық резервтер көлемі 82 пайыздан астамға көбейген.

Қаңтар айында резервтер құрамындағы алтынның құны шамамен 10 млрд долларға өсіп, 65 млрд долларға жуықтаған. Ал алтынның физикалық көлемі 12,8 миллион троя унциясын құрады. Сонымен қатар, валюта резервтері 1,2 млрд долларға қысқарып, 9,5 млрд долларға дейін төмендеген.

Сондай-ақ осы аптада «ӨзА»-да «Орталық Азия мен Германия ынтымақтастығы дамиды» деген тақырыптағы ақпарат жарияланды.

Келтірілген деректерге сүйенсек, Берлин қаласында Франк-Вальтер Штайнмайер және Орталық Азия елдерінің сыртқы істер министрлері арасында кездесу өтті.

Тараптар өзара байланыстардың қарқынды өсіп келе жатқанын атап өтіп, «Орталық Азия – Германия» форматындағы серіктестікті одан әрі дамытуға дайын екендіктерін растады.

Сауда-экономикалық және инвестициялық ынтымақтастық ауқымын кеңейтуге, көлік және транзит тізбегін нығайтуға, сондай-ақ бірлескен энергетикалық жобаларды жүзеге асыруға ерекше назар аударылды.

Қатысушылар тұрақты дамуды қамтамасыз ету, климаттың өзгеруіне қарсы күрес жүргізу, соның ішінде аймақтағы мұздықтардың еруі мәселесін шешу бағытындағы күш-жігерді үйлестірудің маңыздылығын бірауыздан қолдады.

Өз кезегінде президент Штайнмайер Германия Федеративтік Республикасының Орталық Азия елдерімен көпқырлы ынтымақтастықты одан әрі нығайтуға мүдделі екенін жеткізді.

Жамбыл облысынан Қытайдың көне дәуірлеріне тиесілі теңгелер табылды - Жэньминь жибао

Қазақстан археологтары еліміздің оңтүстігіндегі Жамбыл облысы аумағынан VIII–XII ғасырларға жататын көне теңгелердің бір тобын анықтады. Бұл туралы Жэньминь жибао тілшісі Ли Чян 11 ақпанда Астана қаласынан хабарлады. 

Қытайлық БАҚ-тың мәліметінше, табылған жәдігерлердің басым бөлігі VIII–XII ғасырлар аралығында соғылған. Олардың қатарында Қытайдың Таң және Сун әулеттері кезеңіндегі мыс теңгелер бар.

Мамандар бұл олжаны Ұлы Жібек жолы бойындағы сауда-экономикалық байланыстардың қарқынды дамығанының нақты айғағы ретінде бағалап отыр. Археологтардың айтуынша, табылған теңгелердің тарихи әрі ғылыми құндылығы жоғары, олар ежелгі сауда қатынастары мен аймақаралық экономикалық байланыстарды зерттеуге маңызды дереккөз болмақ.

Қазіргі уақытта табылған заттарға кешенді археологиялық және ғылыми зерттеу жұмыстары жүргізілуде. Зерттеу аяқталғаннан кейін көне теңгелер өңірлік музей қорына тұрақты сақтауға берілмек.

Тұтас қоғамда елге барған жолаушы саны 3,5 млрд-тан асты – CNR

Қытайдағы көктем мерекесіне байланысты ұйымдастырылған тасымал кезеңінде жолаушылар ағыны айтарлықтай өсіп, жалпы сапар саны бірнеше миллиардтық межеден асты, деп хабарлайды Қытайдың «Орталық халық радиосы». 

Аталған БАҚ-тың дерегінше, көктем мерекесіне орай басталған тасымал науқаны аясында 16 ақпанға дейін тұтас қоғам бойынша өңір аттаған жолаушылар саны 3 миллиард 500 миллоннан асты.

Ресми мәліметке сәйкес, сапарлағандардың тәуліктік орташа көрсеткіші 230 млн адамды құрады. Бұл – 2025 жылдың сәйкес кезеңімен салыстырғанда 4%-ға жоғары.

Дереккөз мәліметінше, жолаушылар ағынының артуы мерекелік кезеңдегі ішкі қозғалыстың жандануымен байланысты.

Жасанды интеллект чат-боттары жарнама алаңына айналуда - TRT

Чат-боттарға жарнамалар мен демеушілік контенттің қосылуы жасанды интеллект пайдаланушылары үшін құпиялылыққа қатысты алаңдаушылық тудырды.

«OpenAI» жүздеген миллиард долларлық шығын міндеттемелерін жаңа табыс көздерімен теңестіруді бастау мақсатында тегін және төмен ақылы пайдаланушыларға чат-боттарда жарнама көрсете бастады.

Бұл туралы осы аптада Түркия Радио Телевизия порталы хабарлады.

Аталған БАҚ-тың келтірген мәліметтеріне сүйенсек, «OpenAI»-ден бөлек «Microsoft» 2023 жылдан бері «Copilot» жасанды интеллект ассистентінде контекстке негізделген жарнамалар мен демеушілік контенттер жариялап келеді.

Жасанды интеллект іздеу жүйесі «Perplexity» 2024 жылдан бері АҚШ-та жарнамаларды сынақтан өткізіп жатса, «Google» да өткен жылдан бері AI «қысқаша мазмұндамаларында» жарнамаларды сынақ ретінде қолдануда.

Түркиялық басылым бұл жазбасында «Жеке дерек құпиялылығы» деген тақырыпқа тоқталған.

Атап айтқанда «Google» «Gemini» чат-ботында жарнама жариялағысы келеді деген айыптарды бірнеше рет жоққа шығарды. «DeepMind» жасанды интеллект бөлімінің басшысы Демис Хассабис жарнамалардың «өте мұқият қарастырылуы керектігін» айтып, ЖИ-дегі «ең маңызды нәрсе» «қауіпсіздік пен құпиялылыққа деген сенім» екенін білдірді.

Сондай-ақ осы аптада TRT басылымында «Жасанды интеллектті қолдану этикасы алаңдаушылық тудыруда» деген тақырыптағы ақпарат жарық көрді.

TRT-ның дерегінше, БҰҰ Бас хатшысы технологияның қарқынды дамуы жағдайында тең қолжетімділікті қамтамасыз ету үшін технология алпауыттарын 3 миллиард долларлық жаһандық қорды қолдауға шақырды.

БҰҰ Бас хатшысы Антониу Гутерриш жасанды интеллекттің қауіп-қатерлеріне назар аудара отырып, оның болашағын «бірнеше миллиардердің қалауына» қалдыруға болмайтынын мәлімдеді.

Бейсенбі күні Үндістанда өткен жаһандық жасанды интеллект саммитінде Гутерриш технология көшбасшыларын тез дамып келе жатқан бұл технологияға баршаға тең қолжетімділікті қамтамасыз ететін 3 миллиард долларлық жаһандық қорды қолдауға шақырды.

Алтай қаласында қоғамдық автобустар 9 күн тегін жүреді – Алтай ақпараты

Қытайдың ұлттық көктем мерекесіне орай Алтай қаласы тұрғындары мен қонақтарына қолайлы жағдай жасау мақсатында қоғамдық көліктерде 9 күн бойы тегін жүру шарасы ұйымдастырылды, деп хабарлайды қытайлық «Алтай ақпараты» басылымы.

аталған БАҚ-тың дерегінше, 2026 жылдың 15–23 ақпаны аралығында қаладағы 7 автобус желісінде жол жүру ақысы алынбайды. Атап айтқанда, №1, №2, №5, №101 бағыттар, сондай-ақ теміржол вокзалы, әуежай және шаңғы базасына қатынайтын арнайы желілер тегін қызмет көрсетеді.

Негізгі қалалық бағыттар күн сайын 09:20-дан 20:20-ға дейін жүреді. Әуежай бағыты ұшақтардың келу уақытына қарай ұйымдастырылса, теміржол вокзалына қатынайтын автобустар белгіленген кесте бойынша жүреді. Ал шаңғы базасы бағыты 09:50-ден 23:20-ға дейін қызмет етеді.

Қалалық көлік қызметі тұрғындарды қоғамдық тәртіпті сақтап, аялдамалар мен автобус ішінің тазалығын қорғауға шақырды.

Сондай-ақ осы аптада «Алтай ақпараты» басылымында «Жеменей шекара өткеліндегі жолаушылар саны 113,2%-ға өсті» деген тақырыптағы ақпарат жарық көрген болатын.

Биыл қаңтар айында Жеменей шекара өткелі арқылы өткен жолаушылар саны өткен жылдың сәйкес кезеңімен салыстырғанда 113,2%-ға артты.

Шекара қызметінің мәліметінше, 31 қаңтарға дейін өткелден 11 мыңнан астам адам өткен. Тәуліктік ең жоғары көрсеткіш 890 адамды құрады. Сонымен қатар 1 500-ден астам көлік тексеріліп, бұл көрсеткіш 28,3%-ға көбейген.

Қаңтарда өткелден өткендердің жартысынан астамы туристер. Бір күндік сапарлар, әсіресе Зайсан ауданы мен Шығыс Қазақстан облысы бағыттары сұранысқа ие болған.

Мамандар жолаушылар ағынының өсуін өткізу рәсімдерінің оңтайландырылуымен байланыстырады. Қызметкерлер алдын ала тексеру және ақпараттандыру жүйесін енгізу арқылы өткізу уақытын қысқартқан.

Жауапты ведомство өкілдері бұл шаралар Қазақстан мен Қытай арасындағы экономикалық және гуманитарлық байланыстарды дамытуға ықпал ететінін атап өтті.