Раушан Қажыбаева ТРК ның 30 жылдығы, оның ресурстарының жұмысы және Президент туралы контент жасау туралы

Қазақстан Президентінің Телерадиокешеніне 30 жыл толады. ТРК бас директоры Раушан Қажыбаева Tengrinews.kz сайтына берген сұхбатында медиаресурстың қалай өзгеріп жатқаны туралы айтып, отандық контентке қатысты ойын білдірді және жасанды интеллектінің ықпалы туралы пікірін бөлісті.

Отандық медиа үшін 30 жыл - бұл айтарлықтай уақыт. Үш онжылдық ішінде медиаресурс қалай өзгерді?

Қазақстан Республикасы Президентінің Телерадиокешені Үкіметтің қаулысымен 1996 жылы 29 желтоқсанда, Жаңа жыл қарсаңында құрылды.

Құрылған алғашқы жылдары Телерадиокешен негізінен хаттамалық түсірілімдермен, мемлекеттік және коммерциялық арналарға арналған бейнематериалдар дайындаумен айналысып, алғашқы "архив сөрелерін" қалыптастырды. Ол кезде өндіріс процесі аналогты болды, ал түсірілген материалдар кассеталарда сақталатын. Бүгінде біз архивті цифрландыру жұмысын аяқтап жатырмыз, кассеталар салынған сөрелер мен карточкалардың орнын серверлер, сипаттамасы бар метадеректер және ыңғайлы іздеу жүйесі басты.

90-жылдардың аяғына қарай ТРК өзінің алғашқы деректі фильмдері мен бейнероликтерін түсіре бастады, олар қазақстандық телеарналардың эфиріне шықты. ТРК үшін жаңа болып саналған бұл қызмет түрі Қазақстан Үкіметінің 1999 жылғы 17 тамыздағы жеке қаулысымен бекітілді. Сонымен қатар ТРК мемлекеттік мекемеден жабық коммерциялық емес акционерлік қоғам болып қайта құрылды.

30 жыл ішінде ТРК мәртебесін бірнеше рет өзгертті. Бұл басқарудың идеалды моделін іздеу болды ма?

Меніңше, бұл ең алдымен ел заңнамасындағы өзгерістерге байланысты болды. ТРК мемлекеттік мекеме, жабық коммерциялық емес акционерлік қоғам және жай ғана КЕАҚ болып үлгерді.

2019 жылдан бастап Президенттің тапсырмасы бойынша және ТРК құрамына кіретін Президент Іс Басқармасының жүйелі қолдауымен Телерадиокешенді дамыту жұмыстары жүргізіліп жатыр.

ТРК-ны Президенттік медиаресурс деп атайды. Бұл анықтамаға сіз қандай мағына бересіз? Ол өндіріс ауқымын әлде жұмыстағы жаңа тәсілдерді көрсете ме?

Бұл, ең алдымен, жүйелілік. ТРК – біздің Президентіміз туралы контент шығаратын фабрика. Ал біздің басты ньюсмейкеріміз – Президент!

Мен үшін мықты медиажүйе – жылдамдық, редакциялық жұмыс, визуалды сапа және таратылым бір-бірінен бөлек болмайтын жүйе. Олар нәтиже үшін ортақ жауапкершілікпен байланысқан. ТРК – бұл теледидар, халықаралық және цифрлық кеңістікте еш жалған қарапайымдылықсыз тренд орнатып отырған кросс-медиалық компания. Біз контентті Қазақстанда да, шетелде де түсіреміз, жазамыз және таратамыз.

Басты телевизиялық ресурс – Jibek Joly. ТРК-ның өзі сияқты, Jibek Joly – бірегей арна. Оның күнделікті эфирінің төрттен біріне жуығы live режимінде өтеді.

Біз қазақстандық нарықта алғашқы болып шетелдік сериалдардың жат идеологиясын импорттаудан бас тарттық. Олардың орнын "Жаңа уақыт", "Новое время", "Талдау: аналитикалық шолу", "Бүгін.Live", "Сенім студиясы", "Дәмді.Life" және басқа да жеке авторлық жобаларымыз басты. Аудитория біздің жобаларымызды жақсы көрді, ал арна отандық телеарналардың үздіктер тізіміндегі өз орнын сақтап қалды.

Біз аудиториямен "үнжария" (рупор) түріндегі қарым-қатынастың келмеске кеткенін мойындадық. Бүгінде көрермендер өздері таңдаған медиаресурспен өзара әрекеттес болғысы келеді. Дәл осыған live-жобалар арқылы қол жеткізуге болады. Біздің аудитория пассивті емес, контент жасауға белсенді қатысатыны бізді қуантады – көрермендер студия қонағы болады, нақты уақыт режимінде сұрақ қоюға, бағдарлама жүргізушілерімен және қатысушыларымен тілдесуге мүмкіндігі бар. Кейбір жобаларда классикалық декорацияларды елорда көшелерінен нақты уақыт режимінде берілетін динамикалық көріністерге ауыстырдық.

Әрине, біз теледидардың отбасылық бос уақытты өткізудің ең кең таралған және қолжетімді түрі болып қала беретінін де ұмытпаймыз. Авторлық шоулар, ауқымды жобалар, кино және мультипликация күн сайын мыңдаған көрерменді Jibek Joly хабар тарататын экран алдына біріктіреді.

Тікелей эфирдің, сұранысқа ие контенттің және тақырыптар мен жанрлар теңгерімінің осы симбиозы біз үшін өте қымбат – көрермен сенімін қалыптастырады.

Біздің құрылымда барлығы 6 БАҚ бар. Jibek Joly телеарнасының ішкі нарықтағы жұмысын интерактивті форматта хабар тарататын аттас радио толықтырып тұр. Астанада 101.4 FM толқынында шығатын және Интернет желісінде қолжетімді радиостанциямыздың тыңдармандары да студия мен эфир қонағы бола алады.

"ҚазАқпарат" халықаралық ақпарат агенттігі кейінгі жылдары елдегі басты ақпарат агенттігі мәртебесін қайтарды. Бүгінде агенттік үздік 3 жаңалық ресурстарының қатарына кіреді, өзінің халықаралық серіктестер базасын қалпына келтіріп, молайтты. Материалдары Жапониядан АҚШ-қа дейінгі әлемдік БАҚ-тарда күн сайын дәйексөзге алынатын басты сенімді өңірлік хабқа айналды.

Сыртқы ақпараттық кеңістікте "ҚазАқпарат" ХАА-мен бірге Silk Way брендінің – Silk Way, Silk Way Cinema және Silk Way Prime телеарналары жұмыс істейді.

Бұл – тек Қазақстанда емес, бүкіл Орталық Азиядағы шетелге 6 тілде хабар тарататын және 120-дан астам елді қамтитын жалғыз халықаралық арналар. Арналардың шетелде 300-ге жуық ретрансляторы және 22 ресми дистрибьюторы бар.

Бізде жаңа буын кәсіби мамандарынан жасақталған диджитал-лаборатория жұмыс істейді. Бұл мамандар смартфонмен бірге өскен аудиторияның тілін жақсы біледі. Олар TRKLAB брендімен вертикалды контент жасап, жасанды интеллект көмегімен бірегей жобалар әзірлейді, сондай-ақ барлық өзекті платформаларда оқырманмен интерактивті байланыс орнатады. Жалпы алғанда, біздің бірнеше ондаған аккаунтымыз бар.

Біздің Деректі кино орталығымыз да жаңғыртылды. Деректі кино орталығы біз үшін – компаниямыздың жүрегі, қара шаңырағы.

Команда фестивальдік фильмдер түсіреді, шет тілдерінде түпнұсқа контент дайындайды. Орталық Азия нарығында алғаш рет вертикалды форматтағы деректі фильмдерді шығарып, осы бағытты дамытып келеді.

Ағылшын, қытай және француз тілдеріндегі деректі жобалар шетелдік серіктестеріміздің эфирінен көрсетілсе, қазақ және орыс тілдеріндегі өнімдеріміз республикалық арналардан бөлек, отыздан астам өңірлік телеарналарда таратылады.

Жақында өткен Astana Media Week барысында қазақстандық контентті қалай жаһандық деңгейге шығаруға болатыны және шет тілдеріне аударудың неге тиімсіз екені қызу талқыланды. Бұл туралы сіз не ойлайсыз?

Silk Way телеарнасы іске қосылған сәттен бастап біз үшін бұл өндірістік қалыпқа айналған. 2022 жылы арна жаңартылғаннан бері эфирге шығатын барлық жаңа жоба түпнұсқада ағылшын тілінде дайындалады. Сөзбе-сөз аударманың келмеске кеткенін анық түсіндік, сондықтан Қазақстанда және Орталық Азияда алғаш болып ағылшын тілінде студиялық жаңалықтар мен сараптама жасайтын кәсіби мамандар командасын құрдық.

Ал 2024 жылы "ҚазАқпараттың" ағылшын тілді жаңалықтары qazinform.com жаһандық доменіне көшті. "Content is King, but distribution is Queen" (Мазмұн - патша, тарату - патшайым) деген тәмсіл осыған дөп келеді.

Тек биылдың өзінде Silk Way мен "ҚазАқпарат" редакцияларының материалдарына әлемнің ондаған елінің БАҚ-тары сілтеме жасады. Олардың қатарында көршілес Ресей, Өзбекстан, Қырғызстан және Түрікменстаннан бөлек, АҚШ, Қытай, Жапония, Корея, Үндістан, Германия, Франция, Ұлыбритания, Испания, Чехия, Венгрия, Сербия, Болгария, Түркия, Индонезия, Пәкістан, БӘӘ, Катар сияқты Еуропа, Азия, Таяу Шығыс елдері, тіпті Перу, Чили, ОАР және Того БАҚ-тары бар.

Жалпы алғанда, біздің ағылшын тілді БАҚ-тарымыз – Silk Way мен "ҚазАқпарат" материалдарына 2026 жылы шетелдік медиа өкілдері 6000-ға жуық рет сілтеме жасады.

Көбіне классикалық телеарналар, ақпарат агенттіктері және жалпы дәстүрлі БАҚ жаңа технологияларға, әсіресе жасанды интеллектке сақтықпен қарайтын консервативті құрылымдар болып келеді. Сіздерде бұл жағы қалай?

Тeleradiokecheni дәстүрлі БАҚ-тың озық үрдістерін, жаңа медиа мен технологияларды, өзекті трендтер мен контент форматтарын тоғыстырады. Осының бәрі бізге кросс-медиалық және мультиформаттылық сипат береді.

Нейрожелілер күнделікті атқарылатын жұмыстарды оңтайландырып, шығармашылыққа уақыт босатуға, сондай-ақ бірегей эфирлік және желілік контент жасауға көмектеседі. Бұл бағыттағы мүмкіндіктер шынымен де шексіз.

Тeleradiokecheni 2024 жылдың өзінде-ақ вертикалды форматтағы алғашқы мини-фильмді ұсынды. Сол кездегі нейрожелілердің бірегей мүмкіндіктері Президентіміздің, оның ішінде көбі басында кәдімгі фотопленкаға түсірілген суреттерін "жандандыруға" мүмкіндік берді.

Жасанды интеллектіні жауапкершілікпен және ақылға қонымды пайдалану игі істерді шешуге мүмкіндік береді. Өткен жылы ЖИ көмегімен эфиріміз үшін "Фиксики" мультсериалының сурдоаудармасын жасадық. Бұл ерекше қажеттіліктері бар ең кішкентай көрермендерімізге деген қамқорлығымыздың көрінісі болды.

Сонымен қатар 2025 жылы Jibek Joly эфирінде цифрлық сауаттылық туралы 100 бейнесабақ жарық көрді. Осы 100 эпизодтың барлығы бірде-бір кадр түсірілмей, тек генерациялау әдісімен жасалды.

"ҚазАқпарат" пен біздің жаңалықтар редакцияларымызда ЖИ ақпаратты іздеп, бастапқы өңдеуден өткізеді, аудио және видеоматериалдардың мәтінін шығарады, материалдарды безендіруге арналған бейнелерді жасайды. ЖИ үлкен ақпарат көлемін талдауға, шет тілді дереккөздерге мониторинг жүргізуге, базалық фактчекинг жасауға және мәтіндерді жарияланым тілінің нормаларына сәйкестігіне техникалық тексеруден өткізуге көмектеседі.

Жаңа буын редакциясы – TRKLAB-та нейрожелілермен жұмыс генеративті контент жасауға және ақпарат агенттігі мен телеарна материалдарын жаңа тұпаттағы оқырмандарға бейімдеуге бағытталған. Мұндай оқырмандар ұзақ мәтіндерден тез жалығады және "кликтік-клиптік" медиа тұтынуға бейім келеді. ЖИ баяндауды қысқартып, оны тезис түрінде әрі ақпараттық мазмұнын жоғалтпай жеткізуге көмектеседі.

Маңызды жайт, ЖИ-ге негізделген жобалар адамның белсенді қатысуын талап етеді және оны тек нейрожелінің өзі ғана жасай алмайды. Біз Мемлекет басшысының: "Зияткерлік жүйелер адамды алмастырмауы керек, олар адамның қабілетін толықтырып, күшейтуге арналған", – деген қағидатын ұстанамыз.

"ЖИ-ді жауапкершілікпен және ақылға қонымды пайдалану". Бұл сіз үшін нені білдіреді?

2026 жылды Президентіміз цифрландыру және жасанды интеллект жылы деп жариялады, ал Қазақстан – Президент тапсырмасымен Жасанды интеллект министрлігі құрылған әлемдегі небәрі бес мемлекеттің (БАӘ, Ұлыбритания, Канада, Албания - ред ескертпесі) бірі.

Әлемдегі көптеген әріптесіміз журналист мамандығының болашағы туралы таласып жатқанда, нейрожелі адамның орнын баспай ма, жаңалықтар журналистикасы синтетикалық контенттің шырмауында қалмай ма, дипфейктердің шексіз кеңістігіне жұтылып кетпейміз бе деген сұрақтар мазалайды.

Біз жасанды интеллектен қауіп пен "қорқынышты" емес, зор мүмкіндіктерді көріп отырмыз. Әрине, егер ақылға қонымды сақтық сақтамасақ және жалпы мамандыққа салғырт қарасақ, мұның бәрі болуы мүмкін. Бірақ бұл өз қолымыздағы шаруа.

Жақында Астанада генеративті киноның алғашқы жаһандық фестивалі – Astana AI Film Festival өтті. Финалға шыққан жұмыстарды тамашалап, шыны керек, тәнті болдық. Бұл Қазақстанның жасанды интеллектті енгізу мен пайдалану саласындағы ізашарлардың бірі екендігінің тағы бір дәлелі.

Фестивальдің идеясы вице-президент Ерлан Қаринге тиесілі, ал оны жүзеге асыру Қазақстанның креативті индустриясының жас әрі талантты көшбасшылары Алмас Жали мен Айзатулла Хусейннің командасына жүктелді.

Фестивальге 125 елден барлығы 8067 жұмыс келіп түсті, олар жалпы жиынтығы 100 мыңнан аса минуттық генеративті контентті құрады. Бұл қомақты жүлде қоры бар, нағыз әлемдік деңгейдегі оқиға болды.

Бұл жаһандық жоба, әлемдік деңгейге шыққан қазақстандық креаторлардың алғашқы жобасы – Silk Way Star халықаралық музыкалық телебайқауы сияқты дәстүрге айналатынына күмән жоқ. Алғашқы маусым бүкіл әлем бойынша 1 миллиардтан аса көрермен жинап, 9 елдің эфирінде көрсетілді. Дауыс беруге 43 елдің азаматтары қатысып, 60 мемлекеттің БАҚ-ы байқау барысы туралы жаңалықтарды таратты.

Биыл Қытайдың Иу қаласында серіктесіміз – Қытай Медиакорпорациясымен (CMG) бірге екінші маусымның түсірілімін аяқтадық, ол жақын арада Jibek Joly эфиріне шығады. Қытайда бұл жоба елдің жетекші екі телеарнасы – CCTV 3 және
CCTV 15 арқылы көрсетіліп жатыр.

Жобаның үшінші маусымының түсірілімі келесі жылы Қазақстанда өтеді.

Өткен сұхбатыңызда Silk Way телеарнасының негізінде Орталық Азия елдерінің өңірлік телеарнасы туралы айтқан едіңіз. Осы жылдың қазан айында Авазада өткен Орталық Азия мен Әзербайжан мемлекет басшыларының Консультативтік кездесуінде Президентіміз ортақ ақпараттық кеңістік құрудың маңыздылығын атап өтті. Бұл жоба қалай ілгерілеп жатыр?

Silk Way базасында Орталық Азия елдерінің жалпыөңірлік арнасын құру – біздің перспективалы жобаларымыздың бірі.

Бүгінде Silk Way эфирін Өзбекстан, Түрікменстан, Қырғызстан және Тәжікстандағы әріптестерімізбен бірге өңірлік контентпен толтырып жатырмыз. Біз серіктес елдердің ұлттық хабар таратушыларымен және уәкілетті органдарымен бірқатар екіжақты келісімдер жасастық.

Қазан айында түрікменнің Аваза қаласында өткен Орталық Азия мен Әзербайжан мемлекет басшыларының Консультативтік кездесуі және ТМД Мемлекет басшылары кеңесі аясында біз тұрақты қазақ-түрікмен медиакеңесін құру туралы тарихи келісімге қол қойдық. Бұл екі елдің медиа саласындағы ынтымақтастық тарихындағы және жалпы өңірдегі осындай тұрпаттағы алғашқы құжат.

Өзара іс-қимыл динамикасы, әрине, әртүрлі, бірақ бұл Silk Way эфиріндегі Орталық Азияға арналған алғашқы арнайы тақырыптық блокты толтыруға жеткілікті.

Біз өңір елдерінің уәкілетті органдары деңгейіндегі кешенді ведомствоаралық келісім бойынша жұмысты жалғастырып жатырмыз, ол жүйелі үйлестіруге және толыққанды мемлекетаралық келісімге жол ашады. Бұл "гештальтты" Мәдениет және ақпарат министрлігі мен Сыртқы істер министрлігіндегі әріптестерімізбен бірлесіп жабамыз деп үміттенемін.

Биыл Астанада екі үлкен шара өтті: CMG апталығы және Al Jazeera-ның екінші апталығы. Әлемдік ірі медиакомпаниялармен қандай шарттармен жұмыс істейсіздер?

Бүгінде бізде бүкіл әлемдегі телерадиокомпаниялармен және ақпараттық агенттіктермен жасалған 70 келісім бар. Біздің серіктестеріміздің арасында Al Jazeera, Қытай Медиакорпорациясы, TRT, Синьхуа, Jiji Press, Kyodo, Yonhap, Aju News Corporation, Anadolu Agency, Agenzia Nova, Adnkronos, Belga News, VNA, ANI, Azertac, Petra, IRNA, WAM, Saudi Press Agency және басқа да көптеген агенттік бар.

Бұдан бөлек, біз бірқатар халықаралық салалық ұйым мен бірлестіктердің мүшесіміз. Азия-Тынық мұхиты ақпараттық агенттіктер одағында Телерадиокешен техникалық комитеттің мүшесі, ТМД-ға қатысушы елдердің мемлекеттік және қоғамдық телерадиокомпаниялары басшыларының кеңесіне, Мемлекетаралық ақпараттық пулға кіреді және Ислам ынтымақтастығы ұйымының Ақпараттық агенттіктер одағының белсенді қатысушысы болып саналады.

Серіктестер үшін Телерадиокешен Қазақстан мен Орталық Азиядан шынайы әрі жедел жаңалықтар тарататын хабқа айналды, бұл олардың бізбен өзара іс-қимыл жасауының басты уәжі.

Сұрағыңызға тікелей жауап беретін болсам: біз шетелде эфир уақытын немесе газет беттерін сатып алмаймыз. Бірде-бір серіктесімізбен қаржылық қарым-қатынасымыз жоқ, әлемдік агенттіктер іліп әкеткен ешбір жаңалық үшін ақша төлеген емеспіз.

Алдыңғы сұхбаттарымызда еліміздің медианарығындағы мәселелер туралы бірнеше рет айтқан едіңіз. Телевизиялық жарнама нарығының іс жүзіндегі монополиялық сипаты, телеөлшемдер жүйесінің осалдығы, отандық хабар таратушыларды қорғау қажеттілігі туралы мәселе көтерген болатынсыз. Қазіргі жағдай қалай?

Шынында да, ондаған жылдар бойы еліміздің теледидар, жарнама және жалпы медиа нарығында көптеген теңгерімсіздік жинақталды, олардың бір бөлігін ең алдымен реттеушінің, сондай-ақ нарықтың бірлескен күш-жігерімен жою мүмкін болды.

Тележарнама нарығы бәсекелестікке ие болды, жаңа ойыншылар пайда болды, телеарналар селлерлер арасында нақты таңдау жасау және шарттар бойынша саудаласу мүмкіндігін алды. Телеөлшемдер жүйесін де сапалы жақсартуға қол жеткізілді.

Телерадиокешен белсенді мүшесі болып саналатын Ұлттық медиа қауымдастығының күш-жігерінің арқасында бүгінде өлшемдер мегаполистерден шағын қалаларға дейінгі бүкіл ел халқын қамтиды. Біз ақыры тек ірі қала тұрғындарының емес, барлық қазақстандықтың нені көретінін және неге басымдық беретінін білдік. Кабельдік теледидар операторларының деректерін телеөлшемдер жүйесіне интеграциялау бойынша жұмыс жүргізіліп жатыр. 

Онда мәселе неде? Неге телеарналар табыстың төмендеуіне шағымданады, ал рейтинг жүйелі түрде төмендеп барады? Не нәрсеге назар аудару керек?

Тез өзгеретін нарық жағдайында отандық ақпараттық кеңістікті қорғау мүдделеріне жауап беретін реттеуші өрістің нәзік баптауы қажет.

Бүгінде отандық теледидар айтарлықтай қатаң реттеу жағдайында жұмыс істейді. Бізде отандық өнімді хабар тарату көлемі, тілдік теңгерімді сақтау, тәулігіне және сағатына жарнама көлемін шектеу және оның мазмұны бойынша талаптар бар.

Бұл ретте шетелдік хабар таратушыларға бұл талаптар қолданылмайды. Иә, олар Қазақстанда жарнамадан ақша таппайды, бұған тыйым салынған, бірақ олар біздің көрермендеріміздің назары үшін бәсекелесіп, өздерінің әлдеқайда ауқымды жарнама нарықтарында салыстыруға келмейтін көп ақша тауып, өз елдерінің мемлекеттік қолдауына ие болады.

Интернет желісінде мүлдем шектеулер жоқ. Бәріміз YouTube-тегі контентті көреміз, сонда не көріп жүрміз? Ондағы жарнамалық роликтердің саны мен ұзақтығы тек өсіп жатыр және ешқандай шектелмеген. Бұл ретте көптеген бейнеде "автордан" деп аталатын ішкі жарнамалық интеграция да бар.

Іс жүзінде бұл отандық жарнама беруші жарнамалық хабарлама үшін бейнехостингке ақы төледі, платформа жарнамалық роликті орналастырды және қазақстандық көрермен оны көрді, ал ақшаны YouTube-тің өзі мен контент авторы алды дегенді білдіреді. Яғни, ақша таза күйінде қазақстандық нарықтан шетелге кетті. Негізінде біз шетелдік авторлардың контент өндірісін дотациялап отырмыз, ал отандық авторлар шығындарды қысқартуға, эфирді арзандатуға және көрермендердің жаңа жылыстау толқынына тап болуға мәжбүр.

Отандық желілік ресурстарда да жағдай осыған ұқсас. Біз кез келген шетелдік сайтқа кіріп, қазақстандық компаниялардың жарнамасын көреміз. Жарнама беруші аудиториямен жарнамалық байланысын орнатты, бірақ ақша тағы да шетелге кетіп, шетелдік ресурс пен Google немесе Meta жарнамалық желісіне бұйырды.

Қазақстанда ұсынылған көптеген шетелдік онлайн-кинотеатр әзірге реттеу аясынан тыс қалып отыр.

E-commerce алаңдары бөлек бір блок. Ешқашан бұқаралық ақпарат құралы болмаған электрондық сауда агрегаторлары жарнамалық қызмет көрсетеді, бұл ретте аудитория үшін ешқандай контент шығармайды! Олардың кейбіреулерінің жарнамалық табысы бүгінде бүкіл тележарнама нарығының көлемімен теңесіп қалды.

Бірақ бұл әлемдік тренд қой. Ақпараттық кеңістіктің шекаралары біртіндеп жойылып барады, контент жаһандық өнімге айналып жатыр…

Тренд контенттің жаһандық болуында, ал жарнама ақшасының ұлттық болып қалуында. Біз прогресті тоқтатуға тырысу мүмкін емес екенін айтқан болатынбыз. Оны дұрыс басқару, қазіргі шынайылыққа сәйкес келетін нормативтік-құқықтық база құру, отандық медиа мүддесі үшін реттеуші өрісті нәзік баптау қажет.

Мерейтойларыңызды қалай атап өтіп жатырсыздар?

Мерейтойлық жылды қоғам мен жалпы сала үшін пайдалы өткізуге тырысамыз. Сіз бұған дейін атап өткеніңіздей, медиа мамандары мен болашақ журналистер үшін ТРК биыл екі ауқымды жоба – CMG апталығы мен Al Jazeera апталығын ұйымдастырды.

Әлемдік екі ірі медиа-гиганттың үздік мамандары бір апта бойы өз тәжірибелерін және озық практикаларын бөлісті, лекциялар оқып, практикалық сабақтар өткізді.

Мамыр айынан қыркүйекке дейін еліміздің барлық облысында республикалық кинолекторий өтті, ол көрерменге біздің үздік деректі жұмыстарымыздың 30-ға жуығын үлкен экранда тегін көруге мүмкіндік берді. Өңірлік көрсетілімдерге ерекше мән берілді, онда әкімдіктердің қолдауымен Мемлекет басшысының қызметі мен еңбек адамдары – қазақстандықтар туралы жобалар үлкен экранға шықты. Көрсетілімдердің ешбірінде залда бос орын болған жоқ.

Жыл бойы ТРК топ-менеджерлері еліміздің жетекші жоғары оқу орындары – әл-Фараби атындағы ҚазҰУ, Гумилев атындағы ЕҰУ, Maqsut Narikbayev University болашақ журналистеріне лекциялар оқыды.

Жыл соңына дейін Президенттің қызметі туралы 200-ден астам бірегей фотосурет ұсынылатын эксклюзивті фотокөрме, сондай-ақ бірқатар басқа да ауқымды іс-шаралар жоспарланған.

Соңғы сауал. Президенттің жанында жұмыс істеу ресми хроникаға ене бермейтін жайттарды көруге мүмкіндік береді. Мемлекет басшысының қандай адами қасиеттері сізді ерекше тәнті етеді?

Оның терең парасаттылығы мен биязылығының сирек кездесетін үйлесімі таңғалдырмай қоймайды. Президент кез келген мәселені ауқымды әрі кең тұрғыдан қарастыра отырып, сонымен бірге нақты адам тағдыры жатуы мүмкін егжей-тегжейлі тұстарға да үнемі көңіл бөледі. Оның ерен еңбекқорлығы мен аса білімдарлығы сүйсіндіреді.

Президент Телерадиокешені шығармашылық ұжымының міндеті – Мемлекет басшысының өзі белгілеген биік межеге сай болуға тырысу.

Аударған: Нұрила Достар

Бізді Google-дың негізгі дереккөздер тізіміне қосыңыз