Дубайда Қазақстан туралы баяндайтын танымдық контент көбейді

Дубайда осыдан 1 ай бұрын іске қосылған әлемдік туризм  секторының тыныс-тіршілігін саралайтын сайт Қазақстан жайлы аптасына оннан аса мақала жариялайды.

Шығармашылық топ көбіне еліміздің табиғаты ерекше өңірлері мен заманауи қызмет түрлерін қаламға арқау етеді. Араб тілінде жарық көретін жазбалардың қай-қайсы да қаралымы жағынан жоғары.

Абдалла Шабан, журналист:

- Ақпарат құралын іске қосар кезде оқырмандарымыз көп болатынын білдік. Себебі араб әлемі үшін Орталық Азия елдері қашан да қызық. Қазақстан жайлы танып-білемін деушілер қарасы қалың. Бір парасы сапар шеккісі келеді. Оларға біз тың мәлімет ұсынып ғана қоймай, сол саяхат турын ұйымдастыруға да көмектесеміз. 

Медиаресурс еліміздің ақпарат құралдарымен тығыз байланыс орната бастады. Келешекте тұтас Орталық Азия аумағын қамтитын өкілдік ашып, контент сапасы мен мазмұнын жақсарту жоспары да бар. Редакция жетекшілерінің айтуынша, Қазақстан - әмірлік саяхатшылары үшін танымал нарық. Жаз және қыс айларында қызығушылық артады. Осы кезеңде олар оқырманға танымдық дүниелерді көп ұсыну қажеттігін аңғарған.

Хомам Хаммодей, туризм және инвестициялық компания жетекшісі /БАӘ/:

- Қазақстанда сырттан саяхатшы тартуға арналған біраз дүние жасалып жатыр. Жақында сіздерде дүниежүзілік көшпенділер ойыны өтті. Өте тартысты әрі танымдық іс-шара болды. Арабтарға Қазақстан жаңа қырынан танылды. Кейінгі 3 жылдан бері байқағаным, сіздерде туризм саласының әлеуеті артты. Елде бірқатар  инфрақұрылым нысаны бой көтеріп, жаңа қызмет түрлері пайда болды. Осының бәрі келешекке салынған инвестиция.

Қазақстанның туристік әлеуетіне деген қызығушылық арнайы мобильді қосымшаның іске қосылуына да түрткі болды. Араб тілінде қызмет көрсететін платформаға еліміздің туристік бағыттары енгізілген. Қосымша жасанды интеллектімен жұмыс істейді. Жаңа бағыттармен толығып отырады. «Қолданушы сапарын алдын ала жоспарлап, билет және қонақүй қызметіне тікелей тапсырыс бере алады», - дейді жоба жетекшілері.

Рауан Мыңбай