Әлемде ЖИ көмегімен жасалған контент көбейді

Бүгінде әлем елдерінде онлайн-контент жасау барысында жасанды интеллект кеңінен пайдаланылады.

АҚШ-та бұл құрал медиа және кино өндірісінде жақсы көрініс тапқан. «Заманауи технологияның жетістігі қарапайым процестерді оңтайландырып, сараптамалық материалдарға көбірек уақыт жұмсауға мүмкіндік береді», - дейді мамандар. Ал Қытайда жасанды сана қарапайым азаматтардың күнделікті тіршілігіне деңдеп енген. Бірақ жасанды интеллект негізінде пайда болған контентті қалай ажыратуға болады? Шет елдерде қандай ережелер бар? 

АҚШ-шығармашылық индустрияға жасанды интеллект енгізу бойынша әлемдік көшбасшы. Мұнда технология автордың толық алмастырушысы ретінде емес, өндірісті жеделдету және контент көлемін ұлғайту құралы ретінде қарастырылады. ЖИ мүмкіндіктерін кең көлемде қолданатын салалардың бірі: бұқаралық ақпарат құралдары. Бұл күнделікті тапсырмаларға көп күш жұмсамай, талдау мен зерттеуге назар аударуға мүмкіндік береді. Материалдың шамамен сценарийі қалыптасқаннан кейін, журналистке фактчекинг, стильді түзету және этикалық мәселелер қалады. Жасанды интеллект автордың жұмысының жартысына жуығын орындағанына қарамастан, соңғы нәтиже үшін жауапкершілік әрқашан редакцияның мойнында. Құрама Штаттарда ЖИ көмегімен пайда болған материалдарды таңбаланбағаны үшін міндетті айыппұл жоқ. Алайда штаттардың деңгейінде мұндай шаралар қазірдің өзінде қолданылады.

Қытай

Қытайда ірі компаниялардың 67% -ы арнайы қосымшалардың көмегімен мәтіндер, бейне жазбалар мен фото-суреттер жасап шығарады. Оның мүмкіндіктерін сан түрлі міндеттер үшін елдің 250 миллионнан астам тұрғыны тұрақты негізде пайдаланады. Қолжетімділігіне қарамастан, ЖИ көмегімен жасалған контентке қатаң реттеу шаралары қарастырылған. Ресми деректер бұрмаланбауы және жалған ақпарат таратылмауы тиіс. Желі қолданушыларын қорғау мақсатында 2025 жылдың қыркүйегінен бастап елде жасанды интеллект жасап шығарған кез келген мазмұнды белгілеуді міндеттейтін жаңа ережелер күшіне енді. Құқық бұзғандарға айыппұл салынады.

Үндістан

Үндістанда да бүгінде ЖИ контент нарығы қарқынды дамып келе жатыр. Елде федералды деңгейде екі ресми тіл қолданылады – хинди және ағылшын тілі. Бұдан өзге әртүрлі провинцияларда 20-дан астам диалект бар. Ең алдымен ЖИ құралы контентті аймақтық тілдерге бейімдеу үшін пайдаланылады. Әсіресе білім беру саласында кең тараған. Алайда Үндістанда медиа нарықта жасанды интеллектіні реттеуге бағытталған заң қарастырылмаған. Қазіргі уақытта билік ақпараттық қауіпсіздік ережелеріне түзетулерді көздейтін заң жобасын әзірлеп жатыр. Олар жасанды интеллект негізінде пайда болған материалдарды міндетті түрде таңбалауды талап етеді.