Ресей Қазақстанмен шекарада қатаң тұрақты кедендік бақылау енгізбек

Ресей өз ішкі нарығын Еуразиялық экономикалық одақ (ЕАЭО) елдерін қосқандағы «жоспарсыз импорттан» қорғау мақсатында Қазақстан және Беларусьпен шекарада қатаң тұрақты кедендік бақылау енгізеді, деп хабарлайды Arasha.kz сайты The Moscow Times басылымына сілтеме жасап.

«Сыртқы нарықтардағы шектеулерді жоюмен қатар, біз ішкі нарықтағы импорт тарапынан болатын жосықсыз бәсекелестікке жол бермеуге тырысамыз. Бұл бағытта экономиканы "ағарту" туралы шешімге сәйкес жұмыс жүргізудеміз. Ең алдымен, бұл ЕАЭО бойынша серіктестерімізбен арада ашық кедендік шекараның болуына байланысты. Нарығымызға ішкі бәсекелестікке нұқсан келтіретін тауарлар түсіп жатыр. Осыған орай, мұндай жосықсыз әрекеттердің жолын кесу үшін өте қатаң шаралар қолдануға ниеттіміз», - деп мәлімдеді Ресей вице-премьері Алексей Оверчук.

Оның пікірінше, серіктес елдермен саудадағы кедергілерді жою жұмысы Ресей нарығына келетін тауарларды бақылауды күшейтумен қатар жүруі тиіс.

РФ вице-премьерінің айтуынша, 2025 жылғы қыркүйекте «тауарларды заңсыз әкелу мен әкетудің жолын кесу және олардың транзитін бақылау мақсатында» Ресей Федералдық кеден қызметіне Ресей-Беларусь және Ресей-Қазақстан шекара учаскелеріндегі мобильді топтардың бақылауын күшейту тапсырылған.

«Бұл қандай да бір уақытша науқан емес екенін бірден айтқым келеді, (...) біз бұл бақылауды тұрақты түрде жалғастырамыз. Кімде-кім Қазақстан тарапындағы шекарада кезек күтіп, назар бәсеңдейді деп үміттенсе, олай болмайды. Бұл біздің нақты ұстанымымыз және оны әрі қарай ұстанатын боламыз», - деді Ресей үкіметі басшысының орынбасары.

Оның сөзіне қарағанда, тексерулер Ішкі істер министрлігінің аумақтық органдарымен, Росгвардиямен, ФСБ шекара қызметімен, Россельхознадзор, Роспотребнадзор және Ространснадзормен бірлесе отырып жүргізіледі.

«Отандық нарықты контрафактіден қорғау мақсатында 2025 жылдың соңында Мемлекеттік бақылау органдары мен Росаккредитация ЕАЭО елдерінде берілген сертификаттар мен декларациялардың қолданылуын тоқтата тұру өкілеттігін алды және тиісті жұмыстар басталып кетті», - деп мәлімдеді Оверчук.