Ресейде парламент сайлауы аяқталды: Единая Россия алда келеді

Ресейде Мемлекеттік дума депутаттары мен өңірлік сайлаудың үш күндік дауыс беруі аяқталды, деп хабарлайды Tengrinews.kz тілшісі РБК басылымына сілтеме жасап.

Бүкілресейлік қоғамдық пікірді зерттеу орталығы (ВЦИОМ) мен "Инсомар" жүргізген экзитпол мәліметтері бойынша, "Единая Россия" шамамен 50 пайыз, КПРФ – 14-тен 15 пайызға дейін, ЛДПР – 10 пайызға жуық дауыс жинады. Мемлекеттік думаға сондай-ақ "Новые люди" және "Справедливая Россия" партиялары да өтеді.

Орталық сайлау комиссиясының Мәскеу уақытымен сағат 21:00-дегі мәліметі бойынша, Мемлекеттік дума сайлауындағы сайлаушылардың келуі 56,6 пайызды құраған. Бұл 1993, 2016 және 2021 жылдардағы көрсеткіштерден жоғары. 20 қыркүйек күндіз ол 50 пайыздан асты, деп хабарлайды РБК.

Басылымның ақпаратынша, ОСК алдын ала нәтижелерді учаскелік комиссиялардың хаттамалары мен электронды дауыс беру мәліметтерінің өңделуіне қарай жариялай бастайды. 2021 жылғы алдыңғы сайлауда Орталық сайлау комиссиясы түпкілікті қорытындыны дауыс беру аяқталғаннан кейін бес күн өткен соң бекіткен болатын.

Дауыс беру Ресей басып алған Украина аймақтарында да өтті. Еуроодақ бұл аумақтардағы дауыс беруді мойындамайтынын мәлімдеп үлгерді, деп хабарлайды Euronews.

Бізді Google-дың негізгі дереккөздер тізіміне қосыңыз