Республика күні: Ақмоланың орман шаруашылықтарына 85 жаңа техника табысталды

Республика күні қарсаңында және Орман шаруашылығы қызметкерлерінің күніне орай сала өкілдері өртті сөндіру, өрт ошақтарын жырту және профилактикалық іс-шараларды жүргізу үшін арнайы жабдықталған жаңа мамандандырылған техника алды.

Ақмола облысының әкімі Марат Ахметжанов орман шаруашылығы қызметкерлеріне көліктердің кілтін және мемлекеттік наградаларды табыс етті.

Фото: Ақмола облысының әкімдігі

— Біздің өлкенің табиғаты ерекше және жануарлар дүниесіне бай. Бұл дана халқымыз ұрпақтан-ұрпаққа ұқыптылықпен мұра етіп қалдырған еліміз үшін баға жетпес байлық. Әрқайсыңыз — адам мен табиғат алдындағы борыштарыңызды абыроймен атқарып келе жатқан өз ісіңіздің кәсіби маманысыз. Табиғатты қорғау саласын сақтау және дамыту мақсатында орман шаруашылығы базасы жыл сайын жаңартылып отыр. Соңғы жылдары ауа райының қиын жағдайына қарамастан ірі өртті болдырмай, жалын ошақтарын ерте кезеңде жедел жойып келеміз, — деп атап өтті аймақ басшысы.

Шара барысында салаға елеулі үлес қосқан 10 қызметкер «Еңбек сіңірген орман өсіруші» және «Қазақстан орманын қорғаудағы мінсіз қызметі үшін» төсбелгілерімен марапатталды.

Фото: Ақмола облысының әкімдігі

Ақкөл ауданы Кеңес орман шаруашылығы мекемесінің директоры Жанат Қожахметов жаңа техниканың кілтін және «Қазақстан орманын қорғаудағы мінсіз қызметі үшін» II дәрежелі медалін алды. Табиғи байлықты сақтау — оның отбасының басты ісі: әкесі мен бауырлары да Отрадное орман шаруашылығында еңбек етеді. Отбасының жалпы еңбек өтілі 85 жылды құрайды.

— Соңғы жылдары мемлекет орман шаруашылығын дамытуға үлкен көңіл бөліп отыр. Бұл бізге зор жігер береді. Жаңа техника өртті тез анықтауға және ерте кезеңде ауыздықтауға, сонымен қатар аумақты патрульдеуге мүмкіндік береді. Біздің аумақ даламен шектесіп отыр, сондықтан бұл техника өртті бастапқы кезеңде сөндіруге көмектеседі, — деп атап өтті Жанат Қожахметов.

Фото: Ақмола облысының әкімдігі

Іс-шара барысында сондай-ақ орман өрттерін ерте анықтау жүйесінің жұмысы көрсетілді. Бұл жүйе қазіргі уақытта бес орман шаруашылығы мекемесінде — Ақкөл, Бұқпа, Кеңес, Краснобор және Куйбышев орман шаруашылықтарында іске қосылған.

— Қазір цифрландыру мен жасанды интеллектті енгізу бойынша қарқынды жұмыс жүргізіліп келеді. Орман шаруашылығы саласы да беталыстан қалыспай отыр, бес орман шаруашылығы мекемесінде алдын ала ескерту жүйесі енгізіліп отыр. Аймақтағы орман қорының жартысынан астамын біз қамтып отырмыз. Соңғы жылдары бізде үлкен орман өрттері болған жоқ. Ерте анықтау жүйесі — бұл уақыт өте келе тұман мен түтінді ажырата бастайтын өздігінен білім алатын бағдарлама. Немесе пеш түтіні мен орман түтінін ажырата алады. Бұл — мұнараларға орнатылған ақылды камералар. Бүгінде облыста 20 шақырымға дейін радиуста жұмыс істейтін 20 камера орнатылған. Бұл жүйе бастапқыда Бурабай ұлттық саябағында сынақтан өтті, — деп атап өтті Ақмола облысы Табиғи ресурстар және табиғатты пайдалануды реттеу басқармасының басшысы Джанет Микишев.

Фото: Ақмола облысының әкімдігі Фото: Ақмола облысының әкімдігі

Спикер Абай ауданындағы оқиғалардан кейін Мемлекет басшысының тапсырмасына сәйкес орман шаруашылығы мекемелерін жабдықтауға ерекше көңіл бөлінгенін қосып өтті. Бұрын орман шаруашылығы мекемелері техникамен толық жабдықталмаған болса, бүгінде парк толығымен жаңартылды.

Фото: Ақмола облысының әкімдігі

Бұдан басқа, қатысушыларға «Бұқпа» орман шаруашылығы мекемесіндегі» заманауи орман өрт сөндіру станциясының жұмысы таныстырылды. Оның ерекшелігі — бұл екінші деңгейлі орман патрульдік өрт сөндіру станциясы жыл бойы жұмыс істей алады, қыста жақын маңдағы елді мекендерде өртті сөндіруге көмектеседі.