Салық реформасы: 1,2 млн кәсіпкер арнайы режимді таңдады

АСТАНА, 4 наурыз – Sputnik. Елде 1,2 миллион кәсіпкер арнайы режимді таңдады, деп хабарлады ұлттық экономика министрлігі.

Ведомство басшысы Серік Жұманғариннің төрағалығымен өткен жиында салық режимдерін таңдау бойынша деректер жарияланды.

Еске салайық, кәсіпкерлер осы жылғы 1 наурызға дейін салық режимін таңдауға тиіс болатын.

"Өзін-өзі жұмыспен қамтығандарға арналған режимді 346 мың адам таңдаған, оның ішінде 265 мың адам – көлеңкелі айналымнан шыққан жаңа қатысушылар. Жеңілдетілген декларация негізіндегі арнайы режимді 1,2 млн кәсіпкер таңдады", - деп жазылған хабарламада.

Айта кетері, өзін-өзі жұмыспен қамтығандарға арналған арнайы режимнің басты артықшылығы, табысқа салық салынбайды және жеке кәсіпкер ретінде тіркелу міндетті емес. Бұл бұрын тіркеусіз жұмыс істеген азаматтардың заңды түрде жұмыс істеуіне мүмкіндік береді.