Сапалы деп есептеймін Мәдиевтен Қазақстандағы интернет туралы сұралды

Премьер-министрдің орынбасары - цифрлық даму, инновациялар және аэроғарыш өнеркәсібі министрі Жаслан Мәдиев Қазақстандағы интернет сапасына қатысты пікір білдіріп, байланыс сапасын жақсарту үшін атқарылып жатқан жұмыстар туралы айтты, - деп хабарлайды Tengrinews.kz.

"Объективті түрде айтсам, интернет сапалы деп санаймын. Бірақ біз мұнымен тоқтап қалмаймыз. Әлі де дамитын және жақсартатын тұстар бар", - деді Мәдиев Астанада цифрлық активтер индустриясын ынталандыру және дамыту мәселелері бойынша өткен брифингте журналистердің сұрақтарына жауап бере отырып.

Оның айтуынша, бүгінде Қазақстанда ауылдық елді мекендерге кең жолақты интернет тарту бойынша ірі инфрақұрылымдық жобалар іске қосылған.

"Құрылыс басталып кетті. Келесі жылдың аяғына дейін серіктестеріміздің көмегімен қосымша 3000-нан аса ауылға интернет жеткізуді жоспарлап отырмыз. Осылайша, қамту деңгейі 92 пайызды құрауы тиіс", - деді вице-премьер.

Сонымен қатар, Мәдиев Қазақстанда 5G желісін дамыту үшін базалық станциялардың белсенді салынып жатқанын хабарлады.

"Қазірдің өзінде 3500-ге жуық базалық станция тиісті қамтуды қамтамасыз етіп отыр. Сондай-ақ, жоспарда - инфрақұрылымды одан әрі жаңғырту жұмыстары бар", - деді ол.

Министрдің сөзінше, Қазақстан біртіндеп 3G технологиясынан бас тартуға көшіп жатыр. Оның орнына 4G және 5G желілері жаңғыртылып жатыр, бұл байланыс сапасына оң әсер етуі тиіс.

Бұдан бөлек, республикалық маңызы бар жолдарды байланыспен қамтамасыз ету жобасы басталады.

"Қазір тиісті инфрақұрылымды салу және тасжолдарды байланыспен қамтуға мүмкіндік беретін базалық станцияларды орнату жұмыстары басталады", - деді Мәдиев.

Вице-премьердің айтуынша, тағы бір маңызды жоба - "Соңғы миля". Бұл бұрынғы жобалар аясында интернет ауылға дейін жеткізіліп, бірақ үй шаруашылықтарына дейін желі тартылмаған елді мекендерге қатысты.

"Бұл жоба да басталды. Сондай-ақ сигналдың кідірісін азайту міндеті тұр. Осының бәрі кешенді түрде жүзеге асырылып жатыр", - деп толықтырды ол.

Google News арқылы жаңалықтарымызды қадағалаңыз