Сарапшылар бір жылда доллар бағамы қанша теңгеге дейін баратынын болжады

Қазақстанның қаржыгерлер қауымдастығының болжамынша, алдағы бір айда доллар бағамы 508,2 теңге, ал бір жылда 542,1 теңге болуы мүмкін, – деп хабарлайды Aikyn.kz сайты.

Бір ай бұрынғы болжам сәл жоғары болған: тиісінше 509,6 теңге және 544,7 теңге.

Сарапшылар теңгеге қатысты оптимизмді бірнеше факторлармен түсіндіреді. Олар – жоғары пайыздық мөлшерлемелер, Ұлттық банк пен квазимемлекеттік сектордың тұрақты валюта конвертациясы, резидент емес инвесторлардың мемлекеттік бағалы қағаздарға қызығушылығы және шикізат нарығындағы бағаның өсуі.

Сауалнамаға қатысқандардың 82%-ы Ұлттық банк базалық мөлшерлемені 18% деңгейінде сақтайды деп күтеді. Алайда айлық инфляцияның 1%-дан 1,1%-ға өсуі реттеушінің қатаң саясат ұстануына ықпал етуі мүмкін.

Сарапшылардың болжамынша, бір жылдан кейін базалық мөлшерлеме 16,75%, ал инфляция 11,4% шамасында болады. Осыған байланысты қатаң ақша-несие саясаты біраз уақыт сақталады.

Сонымен қатар Brent маркалы мұнай бағасының болжамы барреліне 71,5 долларға дейін көтерілді. Ал ЖІӨ өсімі 5%-дан 4,8%-ға төмендейді деп күтілуде.