Шамдар жанбайды Астана аудандарындағы жарықтандыруда не болып жатыр

Астана тұрғындары аулалардағы, көшелер мен жаяу жүргіншілер өткелдеріндегі істемейтін шамдар туралы үнемі хабарлап отырады. Пікірлерге қарағанда, жарықтандыру мәселелері көбінесе жаңа тұрғын үй массивтері мен елорда шетінде туындайды. Tengrinews.kz қалада сыртқы жарықтандыру мәселелері қалай шешіліп жатқанын және қай учаскелер проблемалы болып қала беретінін анықтау үшін Астананың аудандық әкімдіктеріне сауал жолдады.

Астана тұрғындары аулалардағы, көшелер мен жаяу жүргіншілер өткелдеріндегі істемейтін шамдар туралы үнемі хабарлап отырады. Пікірлерге қарағанда, жарықтандыру мәселелері көбінесе жаңа тұрғын үй массивтері мен елорда шетінде туындайды. Tengrinews.kz қалада сыртқы жарықтандыру мәселелері қалай шешіліп жатқанын және қай учаскелер проблемалы болып қала беретінін анықтау үшін Астананың аудандық әкімдіктеріне сауал жолдады.

Нұра ауданының тұрғындары жарықтандыру мәселесіне жиі шағымданады

Нұра ауданы әкімінің аппараты жарықтандыру мәселелері бойынша өтініштердің iKomek 109 сервисі және әлеуметтік желілер арқылы тұрақты түрде түсіп жатқанын растады.

Бұл ретте ведомство 2026 жылдың басынан бергі өтініштердің нақты санын нақтыламады, статистика ашық қолжетімділікте жарияланбайтынын атап өтті.

"Шағымдардың басым бөлігі дәстүрлі түрде қала шетіндегі тұрғын үй массивтерінде, орамішілік аумақтарда және белсенді құрылыс жүріп жатқан, жаңа инженерлік желілер қосылып жатқан аудандарда тіркеледі", - деп хабарлады аудандық әкімдік.

Әкімдік мәліметінше, сыртқы жарықтандыру жүйелеріне мамандандырылған мердігер ұйымдар тұрақты негізде қызмет көрсетеді. Тексерулер жоспарлы режимде, сондай-ақ тұрғындардың өтініштері бойынша және апаттық шығулар кезінде жүргізіледі. Жедел бригадалар күн сайын екінші ауысымда аралап шығады.

Нұра ауданының әкімдігі 2026 жылы жарықтандыруға бөлінген нақты соманы атамады. Сондай-ақ аудан әкімдігі жарықтандыруды күтіп ұстаумен және жаңа желілерді тек "Халық қатысатын бюджет" бағдарламасына енген жаңа қоғамдық кеңістіктер мен аулаларда орнатумен айналысатынын нақтылады.

Әкімдік кейбір учаскелердегі жарықтандыру мәселелерін шешу мерзімдерін де атамады.

Есіл ауданында қай көшелер проблемалы күйде қалып отыр?

Есіл ауданының әкімдігі бүгінгі таңда істен шыққан көше жарығының үлесі 15 пайыздан аз екенін хабарлады.

"Бүгінгі таңда Есіл ауданында істен шыққан көше жарығының үлесі 15 пайыздан аспайды, бұл ретте қалпына келтіру жұмыстары мен шамдарды ауыстыру тұрақты негізде жүргізіліп жатыр", - делінген әкімдік жауабында.

Аудан әкімдігінің мәліметінше, елорданың бірнеше негізгі көшесінде проблемалы учаскелер бар.

Instagram-дағы бұл жарияланымды көру

Астана, кім қайда? (@astana.kto.gde) жарияланымы

Олардың қатарында - Хусейн бен Талал көшесі (Мәңгілік Ел даңғылынан Қ. Қайсенов көшесіне дейін), Қабанбай батыр даңғылы ("Астана Жұлдызы" ТҮК ауданында), сондай-ақ Сауран көшесі (Керей-Жәнібек хандар көшесінен Достық көшесіне дейін) бар.

Әкімдіктегілер негізгі мәселелер пайдалану мерзімі 10 жылдан асқан кабельдік желілердің тозуымен байланысты екенін түсіндірді.

"Туындаған электр қуатының үзілуі мен анықталған ақаулар жедел түрде жойылады", - деп мәлімдеді ведомство.

Сондай-ақ аудандық әкімдік сыртқы жарықтандыру жүйелерін тексеру мен оған қызмет көрсету күн сайын жүргізілетінін хабарлады.

Жарықтандыру бойынша жоспарлар

Әкімдік 2026 жылы Пригородный тұрғын алабында қосымша жарықтандыру тіректерін орнату мәселесі қарастырылып жатқанын нақтылады. Сөз "Аспан" спорт кешенінен "Аспан Парк" ТҮК-не дейінгі учаске туралы болып отыр.

Сарыарқа ауданы тұрғындарынан қанша өтініш түсті?

Сарыарқа ауданының әкімдігі 2026 жылдың басынан бері көше жарығы мәселелері бойынша 1000-нан астам өтініш түскенін хабарлады.

"Анықталған ақаулар бойынша тиісті жұмыстар жүргізілді", - деп мәлімдеді әкімдік.

Әкімдік мәліметінше, аудандағы 330 көшенің 17-сі толықтай жарықтандырылмаған, сондай-ақ 10-нан астам нашар жарықтандырылған учаске тіркелген. Оларды жарықтандыру үшін жобалау-сметалық құжаттама әзірлеп, күрделі құрылыс жүргізу қажет.

Бұған дейін аудандық әкімдік уәкілетті органдарға проблемалы көшелердің тізімін жолдаған болатын. Олардың ішінде Еңлік-Кебек, Земляничная, Орлыкөл, Сүйінбай ақын және басқа да көшелер бар.

Ақаулар қаншалықты тез жойылады?

Әкімдіктегілер ағымдағы ақаулар "өтінімдердің түсуіне қарай" жойылатынын түсіндірді.

"Күрделі жұмыстарды талап етпейтін ақауларды жою мерзімі 1-ден 3 жұмыс күніне дейінді құрайды", - делінген мемлекеттік органның жауабында.

Егер кабельдік желілерді ауыстыру немесе қосымша жұмыстар жүргізу қажет болса, мерзімдер 5–10 жұмыс күніне және одан да көп уақытқа созылуы мүмкін.

Бұл ретте аудандық әкімдік барлық көшенің, аулалар мен қоғамдық кеңістіктердің 95 пайыздан астамы жарамды күйде екеніне сендіреді.

Жаңа жарықтандыру қай жерде пайда болады?

2026 жылы Сарыарқа ауданында аулалар мен көшелердің жекелеген учаскелерінде жаңа жарықтандыру желілерін орнату жоспарланған.

Олардың қатарында Ә. Марғұлан атындағы №40 мектеп-лицейіне қарай беттейтін Ардагерлер көшесіндегі жол бойын, сондай-ақ Ы. Дүкенұлы көшесіндегі TAU University университетіне баратын жолды жарықтандыру жұмыстары бар.

Қосымша жарықтандыру жаңа қоғамдық кеңістіктерде – Байсейітова және Ақыт Үлімжіұлы көшелерінде де қарастырылған. Кенесары көшесін қайта жаңарту аясында кабельдік желілер мен жарық бағаналары жаңартылып үлгерді.

Байқоңыр ауданында жарықтандыру бойынша қанша өтінім түсті?

Байқоңыр ауданында 2026 жылдың 1 қаңтары мен 20 мамыры аралығында iKomek жүйесі арқылы жарықтандыру мәселелері бойынша 371 өтінім түсті. Оның 361-і орындалды, 10-ы жұмыс үстінде.

Әкімдік өкілдері проблемалы учаскелердің негізінен ескірген электр желілерімен байланысты екенін нақтылады. Олардың ішінде Пушкин көшесі (Можайский көпірінен №69 көшеге дейін) және Алаш тас жолы (Қоянды саяжай алабына қарай) бар.

"Көшелерді жарықтандыруды тексеру жұмыстары екі бригаданың күшімен тәулік бойы жүргізіледі. Күндізгі бригада сағат 09:00-ден 18:00-ге дейін, түнгі бригада 19:00-ден 07:00-ге дейін жұмыс істейді", - деп хабарлады әкімдік.

Әкімдік мәліметінше, апаттық ақаулар анықталуына қарай жойылады, ал желілерге қызмет көрсету мердігер ұйыммен жасалған шарт негізінде жүзеге асырылады.

Жаңа шамдар қай жерлерде орнатылады?

2026 жылы Байқоңыр ауданында жаңа қоғамдық кеңістіктерде жарықтандыру орнату жоспарланған.

Олардың қатарында "Тұлпар" СҮ алдындағы сквер, Пушкин көшесіндегі синагога маңындағы сквер, сондай-ақ Кенесары мен Пушкин көшелерінің қиылысындағы аумақ бар.

Бұдан бөлек, жекелеген тұрғын аймақтарда жаңа жарық бағаналарын орнату көзделген.

Алматы ауданының әкімдігі Tengrinews.kz редакциясына толыққанды жауап берген жоқ.

Мән-жайы

Аудандық әкімдіктер көшелерді жарықтандыруды жаңғырту жұмыстары кезең-кезеңімен жүргізілетінін және бұл инженерлік инфрақұрылымды жаңарту мен жобалық құжаттаманы әзірлеуге байланысты екенін атап өтті.