Шардарадағы Келешек мектеп : үйірме жұмыстары оқушы дамуының негізгі тірегі

Түркістан облысы, Шардара ауданындағы №3 жалпы білім беретін мектепте «Келешек мектеп» жобасы аясында қосымша білім беру жұмыстары жүйелі түрде жүзеге асырылып келеді. Білім ордасында оқушылардың бос уақытын тиімді ұйымдастыру, олардың қабілеті мен қызығушылығын дамыту мақсатында үйірме жұмыстары басым бағыт ретінде қарастырылған.

Бүгінде мектепте 14 бағыт бойынша үйірмелер тұрақты жұмыс істейді. Оқу-танымдық бағыттағы «Ағылшын тілі» және «Цифрлық сауаттылық» үйірмелері оқушылардың заманауи білім кеңістігіне бейімделуіне, тілдік және ақпараттық құзыреттілігін арттыруға бағытталған. Бұл үйірмелер балалардың өз бетімен іздену, жаңа технологияларды тиімді пайдалану дағдыларын қалыптастыруға мүмкіндік береді.

Шығармашылық бағытта ұйымдастырылған «Бейнелеу – өнер атасы», «Шебер қолдар ордасы», «Көркем саз», «Домбыра», «Би» үйірмелері оқушылардың өнерге деген қызығушылығын оятып, эстетикалық талғамын, шығармашылық ойлауын дамытуға ықпал етеді. Үйірмелерге қатысушы балалар түрлі мектепішілік және аудандық іс-шараларға белсенді атсалысып, өз қабілетін шыңдап жатыр.

Сонымен қатар спорттық бағыттағы гандбол, футбол, волейбол (ұлдар мен қыздар арасында) үйірмелері оқушылардың салауатты өмір салтын қалыптастыруға, командалық рух пен жауапкершілікті сезінуге тәрбиелейді. Ұлттық құндылықтарды дәріптейтін «Асық ату» және «Бес асық» үйірмелері арқылы жас ұрпақтың салт-дәстүрге деген құрметі артып, ұлттық сана-сезімі нығайып келеді. Ал «Дебат» жастар клубы оқушылардың сыни ойлау, көшбасшылық және шешендік қабілеттерін дамытуда маңызды алаңға айналған.

“Үйірме жұмыстарының нәтижелі жүзеге асуына мектептің заманауи материалдық-техникалық базасы тікелей ықпал етіп жатыр. STEAM сыныптары, жабдықталған зертханалық кабинеттер, музыкалық аспаптармен қамтылған сыныптар, хореография залы, сондай-ақ ағаш өңдеу станоктары бар шеберханалар мен тігін цехы оқушылардың практикалық дағдыларын дамытуға кең мүмкіндік беріп отыр. Келешек мектептеріндегі қосымша білім берудің басты маңыздылығы – баланың тек академиялық біліммен шектелмей, жан-жақты дамуына жағдай жасау. Үйірмелер арқылы оқушылар өз қызығушылығын ерте анықтап, болашақ мамандығына бағыт-бағдар алады, еркін ойлау мен өзіне деген сенімділігі қалыптасады”, - дейді мектеп директоры Еркінәлі Ақбердиев.

Аталған жұмыстардың жүйелі жүргізілуі білікті педагог кадрлар мен тиімді басқару принциптерінің нәтижесі. Үйірме жетекшілері әр баланың қабілетін ескеріп, жеке бағытта жұмыс жүргізсе, мектеп әкімшілігі тарапынан ұйымдастыру мен қолдауға ерекше мән беріліп жатыр.

Қорыта айтқанда, Шардара ауданындағы №3 жалпы білім беретін мектепте жүзеге асырылып жатқан үйірме және қосымша білім беру жұмыстары келешек мектеп үлгісінің маңызды құрамдас бөлігі болып саналады. Бұл тәжірибе – шығармашыл, белсенді, бәсекеге қабілетті жас ұрпақ тәрбиелеуге бағытталған нақты қадам.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.