Шегірткеден қорыққан егін екпес : Референдумға халықтың сенімі қандай?

Алдағы референдум қарсаңында қоғамда түрлі пікір қалыптасып отыр. Әсіресе, бұған дейінгі референдумдар мен сайлау науқандары кезінде заңбұзушылықтар болды деген ақпараттардың таралуы кей азаматтардың сеніміне әсер еткені жасырын емес, деп хабарлайды Arasha.kz.

Осыған байланысты «Халықтың референдумға сенімі қандай?» деген сауалды депутаттарға жолдаған едік. Сондай-ақ өткен саяси науқандарға қатысты айтылған сын-пікірлер мен күмәннің қазіргі қоғамдық көңіл-күйге ықпалы туралы да сұрадық. Халық қалаулылары бұл мәселеге қатысты өз көзқарастарын білдіріп, сенімді арттырудың жолдары жөнінде пікір айтты.

«Мен халық сенеді деп ойлағым келеді», – деп күлді депутат Еркін Әбіл.

Ол сайлаушылармен жүздесу кезінде қойылған сұрақтар мен азаматтардың белсенділігі туралы пікір білдіріп, алда өтетін референдумға тұрғындардың жартысынан көбі барады деп есептейді.

«Мен кездескен аудиторияларда әр түрлі сұрақатар болды. «Бұл бізге қаншалықты керек?», «дәл маған бұл не береді?» деген сияқты сұрақтар болды. Менің ойымша референдумға баратындар саны 60 пайыздан асады деп ойлаймын», – деді депутат.

Депутат Ермұрат Бапи болса бұған дейінгі референдумдарда кейбір заңбұзушылықтар болғанын еске салған тілшіміздің сұрағына жауап бере отырып, алдағы референдумға қатысу мәселесі әр азаматтың өз таңдауы екенін айтып өтті. 

«Шегірткеден қорыққан егін екпес» дейді ғой. Бұрын сайлаулар мен референдумдар кезінде әлде бір жекелеген фактолар болған екен деп, тас бүркеніп жатпаймыз ғой. Қоғам дамып жатыр, ел өзгеріп жатыр. Ақырындап-ақырындап саяси өзгерістер болып жатыр. Оны қалайда біз қабылдап, қатысуымыз керек. Ал оған қандай ұстаныммен барасың? Ол әр азаматтың өз ұстанымы деп ойлаймын», – дейді Ермұрат Бапи. 

Депутат Үнзила Шапақ кездескен адамдардың көпшілігі референдумға сенім білдіріп отырғанын атап өтті. Сол уақытта кей азаматтардың Конституция жобасының мазмұнын толық түсінбей отырғанын, оларға тікелей түсіндіру жұмысы қажет екенін айтты.

«Біз кездескен адамдардың көпшілігі референдумға сенім білдіріп отыр. Ол туралы мен жауапкершілікпен айта аламын. Кездескен адамдардың ішінде Конституция жобасының мәнін нақты аша алмай, мазмұнын түсінбей отырған азаматтар бар. Оларға барып, тікелей бетпе-бет сөйлесіп, түсінісу керек. Мен туралы жазыпты, «бұл кісінің қолында үнемі қағаз жүреді, дайын сұрақтарға жауап беріп тұр ғой деймін» деп, мен бұл қағаз емес, Конституцияның жобасы екенін айтымын», – дейді  Үнзила Шапақ. 

Депутат Айдос Сарым халықтың референдумға сенімі жақсы екенін атап өтті. Ол алты аймақты аралап, негізгі мәселені қолдайтын азаматтардың көп екенін көргенін жеткізді. 

«Мен әр түрлі зерттеулерді қарап отырмын. Негізі халықтың сенімі жақсы. Өзім алты аймақты аралап өттім, негізгі мәселені қолдайтын сияқты. 15 наурызда қанша адам дауыс беретінін көреміз. Біздің Қазіргі құрылған штаб мыңдаған шараны өткізіп жатыр», – дейді мәжілісмен Айдос Сарым.

Айта кетейік, биыл 15 наурызда Қазақстанда республикалық референдум өтеді. Оның басты мақсаты – Конституцияға енгізілетін өзгерістер мен толықтыруларды халықтың пікірі арқылы бекіту. Референдумда азаматтар заң жобасының негізгі бағыттарын қолдай ма, жоқ па екенін шешеді, ал оның нәтижесі елдің саяси дамуы мен мемлекеттік құрылымына тікелей әсер етеді.