Шұңқырға түсіп, жолда қалдық: БҚО да көлік иелері жол сапасына шағымданды

БҚО жолаушылар көлігі және автомобиль жолдары басқармасының басшысы Марат Қуаншалиевтің Kazinform тілшісіне мәлім еткеніндей, биыл Чапаев-Жаңақала-Сайқын (0-130 км) автомобиль жолының 0-51 км бөлігінде жолды ағымдағы жөндеу аясында шұңқырларды бітеу жұмыстары орындалған. Сонымен қатар Чапаев-Жаңақала-Сайқын (0-104 км) автожолын орташа жөндеу барысында 51-102 шақырым аралығында таңдаламалы жөндеу жұмыстары жүргізілген. 

- Дегенмен Қызылоба мен Шайдолла ауылдарының арасында жаңа шұңқырлар пайда болды. Осы шұңқырларды бітеу үшін жолды күтіп ұстау жұмыстарымен айналысатын мердігер мекеме «SSS STORY GROUP» ЖШС-ға тапсырма берілді, - дейді М.Қуаншалиев. 

Жолдың дәл осы тұсы жөнінде облыс тұрғыны Instagram әлеуметтік желісінде жазды. Оның айтуынша, 13 қазан күні Орал қаласынан Жаңақала ауданына қарай бара жатқан мезгілде түнгі сағат 03.30 шамасында Шайдолла ауылының маңында автокөлігін үлкен шұңқырға соғып алған.

Содан машинасының дөңгелегі жарылған.

- Автокөлігімде 3 жасар қызым мен жұбайым болды. Осы жайтты рәсімдеу мақсатында 102 телефонына хабарласайын деп едім, байланыс болмады. Дөңгелек ауыстырып, содан таңғы сағат 07.45-ке дейін сол жерде тұруға тура келді. Жол сапасы өте нашар, терең шұңқырдан қаша алмайсың, - дейді тұрғын.

Тағы бір маңызды мәселе, жолды қысқы кезеңде күтіп ұстау жайын естен шығаруға болмайды. 

- «SSS STORY GROUP» ЖШС қысқы мезгілде автокөліктердің кедергісіз қозғалысын қамтамасыз ету мақсатында аталған жолда күтіп ұстау жұмыстарын жүргізеді. Бұған мыналар жатады: жол бөлігін қар мен мұздан тазарту, жолдың жүріс бөлігін және жиегін қардан аршу, сондай-ақ құм-тұз қоспасын себу, - деп қосты М.Қуаншалиев.

Еске сала кетейік, бұдан бұрын БҚО-да тендерді жеңіп алған депутаттың компаниясы жол салмай отырғанын жазған едік. 

Сондай-ақ Батыс Қазақстанда жолдың шала-шарпы салынуына байланысты әкімдік жауап берді.