Көлік жүргізушілері бензин сапасына шағымданды бірнеше жерден сынама алынды

АСТАНА, 27 тамыз – Sputnik. Қазақстанда бензин сапасына қатысты шағымдардан кейін зауыт пен бірнеше жанар-жағармай станциясынан сынама алынды, деп хабарлайды Sputnik Қазақстан сауда және интеграция министрлігінің ресми сайтына сілтеме жасап.

Бүгінде Павлодар мұнай-химия зауытында тікелей алынған бензиннің арбитраждық сынамалары тәуелсіз зертханаға жіберілді. Ал Sinoil, QazaqOil және Helios қоспалары бар отын үлгілері бөлек зерттеледі.

Сонымен қатар 17 жанармай құю станциясында бензин бақылауға сатып алынды. Атап айтқанда, Алматы (5 сынама), Алматы облысы (5 сынама), Абай облысы (6 сынама) және Жамбыл облысы (1 сынама) алынған.

"Зерттеу нәтижелері бір апта ішінде белгілі болады", - дейді министрлік мамандары.

Осы уақытқа дейін министрлікке Астана қаласынан 9 өтініш, Павлодардан біреу, ал Солтүстік Қазақстан облысынан екі өтініш түскен.

Тексеріс кезінде сынамалар бүкіл жеткізу тізбегі, соның ішінде мұнай базаларынан да алынады. Бензин техникалық регламент талаптарына сәйкес болмай шықса, заңнамада көзделген шаралар қабылданады. Талаптарға сай келмейтін жанар-жағармай материалдарын сатуға тыйым салу және айналымнан алып қою шаралары қарастырылған.