Швейцария Тегерандағы елшілігін жауып тастады

Бұл туралы Швейцарияның Сыртқы істер министрлігі америкалық X әлеуметтік желісіндегі парақшасында хабарлады.

— Қауіпсіздік жағдайының нашарлауына байланысты Швейцария Тегерандағы елшілігін уақытша жабу туралы шешім қабылдады, — делінген хабарламада.

Мәліметке сәйкес, елші мен Швейцарияның бес қызметкері бүгін Ираннан құрлық арқылы шығып, қазір елден тыс жерде қауіпсіз жерде жүр. Ведомство өкілдері қауіпсіздік жағдайы тұрақталған соң қызметкерлер Тегеранға қайта оралатынын айтты.

Сондай-ақ, Швейцария АҚШ пен Иран арасындағы байланыс арнасын делдалдық аясында сақтап отырғаны атап өтілді.

Бұған дейін Швейцарияның қорғаныс министрі Martin Pfister АҚШ пен Израильдің Иранға жасаған соққылары халықаралық құқықты бұзатынын мәлімдеген.

АҚШ пен Израильдің Иранға шабуылы

Израиль мен АҚШ Иран аумағына 28 ақпанда соққы жасады. Бұл кезде Тегеран мен Вашингтон арасындағы келіссөздер жалғасып жатқан еді.

Жауап ретінде Иран тек Израильге ғана емес, сонымен қатар аймақтағы бірқатар нысанға — Қатар, БАӘ және Бахрейн елдеріндегі америкалық әскери базалар орналасқан нысандарға соққы жасады.

Шабуылдар салдарынан Иранның жоғарғы жетекшісі аятолла Әли Хаменеи және бірнеше жоғары лауазымды тұлға қаза тапқаны хабарланды.

Иран билігінің мәліметінше, АҚШ пен Израильдің шабуылдары салдарынан 1332 адам көз жұмған.