Шымкент МӨЗ інде кернеу секірді не болды

Шымкент мұнай өңдеу зауытында электр желісіндегі кернеу төмендеді. Әлеуметтік желілерде тараған ақпаратты "ҚазМұнайГаз" ұлттық компаниясының баспасөз қызметі растады, деп хабарлайды Tengrinews.kz.

Баспасөз қызметінің мәліметінше, кернеудің төмендеуі "KEGOC" АҚ-ның 220 кВ сыртқы электрмен жабдықтау көзі тарапынан болған. Қазіргі уақытта электр энергиясын беру қалпына келтірілді және бір технологиялық қондырғы қайта іске қосылып жатыр.

"Өндірістік нысандар штаттық режимде жұмыс істеп тұр, оқиға мұнай өнімдерінің тәуліктік өндірісіне әсер еткен жоқ, жөнелту жұмыстары қалыпты режимде жүргізіліп жатыр. Зауыт сыртқы электр желілері арқылы электр энергиясымен қамтамасыз етілген", - делінген таратылған хабарламада.

Компания мұндай жағдайлар зауыттағы автоматтандыру және апатқа қарсы қорғаныс жүйелерінің көмегімен барынша азайтылатынын атап өтті.

Анықтама: Шымкент мұнай өңдеу зауыты - Қазақстандағы ең ірі үш МӨЗ-дің ішіндегі ең жаңасы, елдің оңтүстік өңірлерін отынмен қамтамасыз ететін негізгі кәсіпорын. Ол 1985 жылы пайдалануға берілген.

Бұған дейін Атырау мұнай өңдеу зауытында өрт шыққан болатын. Әлеуметтік желілерде оқиға орнынан түсірілген фото және видеолар жарияланды.

Бүгін үкіметте өткен брифингте Энергетика министрі Ерлан Ақкенженов Қазақстандағы төртінші МӨЗ салынуы мүмкін өңірлерді атады.

Google News арқылы жаңалықтарымызды қадағалаңыз