Шымкентте 200 ден астам адам ауыз сумен қамтамасыз етілді

Шымкентте 200-ден астам адам таза ауыз сумен қамтамасыз етілді.

Қала іргесіндегі Айкөл тұрғын үй алабына тіршілік нәрін жеткізуге демеушілер тарапы қолдау көрсетті. Ішкі орамдық желілерді орталықтандырылған жүйеге қосу үшін 15 шақырым құбыр тартылған.

Айкөлдегі ауыз су мәселесі шешімін тапты. Тіршілік нәрін тасып ішіп келген Назым Қалыбекованың үйі орталықтандырылған жүйеге қосылып, сапалы суға қол жеткізді. Тұрмысы жеңілдеп, өркениет игілігіне ілескен жұрттың айтар алғысы шексіз.

Назым Қалыбекова, қала тұрғыны:

- Құдайға шүкір. Келді суымыз. Жақсы. Рақмет, бәріне. Енді жайланамыз деп отырмыз. Әйтеуір огород ексек па деп отырмыз. Жеміс-жидек ексек па деп отырмыз. 

Айкөл тұрғын алабына ішкі орамдық құбыр 5 жыл бұрын тартылған. Алайда қуаңшылық пен жер асты тербелістің әсерінен су деңгейі төмендеді. Осыдан кейін халықтың қала әкімімен кездесуінде мәселеге мән беріліп, бизнестің әлеуметтік жауапкершілігі аясында қолдау көрсетілді. 

Әли Биназаров, қала тұрғыны: 

- Суды тасып, біріне жетпей жатқасын қалаға көшіп жатқаны рас еді. Көке қайтып келеміз деп жатыр енді. Келіңдер, ауылдан қайда барасыңдар деп жатырмыз. Халықтың саны көбейеді дегенге менің сенімім мол.

Биыл тағы Текесу мен Қызылжар-2 тұрғын алаптары таза ауыз суға қосылды. Жыл соңына дейін Ақжайық, Тұран мен Құрсайдағы жаңа құрылыс аумақтарына тіршілік нәрі жеткізіледі. Нәтижесінде қала халқының 99,5% ауыз сумен қамтылмақ. 

Ризабек Меңдіқұлов, қалалық энергетика және инфрақұрылымды дамыту басқармасының басшысы:

- Гидрогеолог, Жиделі, Сайрамдағы Исфиджаб оларды қосса қаланың сумен қамту көрсеткіші 100% көтеріледі. 

«Келесі жылы бұл жұмыстар аяқталса қала халқын таза ауыз сумен түгел қамтуға мүмкіндік туады»,- дейді сала мамандары.  

Нұрсұлтан Мұхамеджан, Нұрмахан Бекмұратов