Үкімет халықты ауыз сумен 100 процентке қамтамасыз еткенін мәлімдеді

АСТАНА, 13 қаңтар – Sputnik. Мемлекет басшысының 2025 жылдың соңына дейін халықты толығымен ауыз сумен қамтамасыз ету тапсырмасы орындалды. Бұл туралы құрылыс және өнеркәсіп вице-министрі Қуандық Қажкенов мәлімдеді, деп хабарлайды Sputnik Қазақстан тілшісі.

Ресми мәліметке сәйкес, осыдан төрт жыл бұрын ауыл халқының 90 пайызы және қала халқының 97,5 пайызы сумен жабдықтау қызметтеріне қол жеткізген болатын. Осы мақсатта қыруар қаржы бөлінген. Былтыр халықты ауыз сумен қамтамасыз ету көрсеткіші 100 процентке жетті.

"Осылайша, жергілікті атқарушы органдардың ақпаратына сәйкес, мемлекет басшысының тапсырмасы толық орындалып, еліміздегі 90 қала мен 7,5 миллион тұрғыны бар 6 087 ауыл ауыз сумен 100% толық қамтамасыз етіліп отыр", - деді Қажкенов үкіметтің бүгінгі отырысында.

Осы орайда вице-министр ауылдардың сумен қалай қамтамасыз етілгенін де айтты.

4 747 ауыл орталық су жүйесімен қамтылған (ауыл халқының 96%);

1 340 ауыл орталықтандырылмаған су жүйесімен қамтылған (1 102 ауылда суды тазарту блок-модульдері орнатылды, ал 219 адамнан аз елді мекенде сумен жабдықтау ұңғымалар есебінен жүзеге асырылады).

Сондай-ақ, 19 елді мекенде шалғай орналасуына және су көздерінің болмауына байланысты ауыз су тасымалдау арқылы жеткізіледі. Ондай елді мекендерде орта есеппен 70 адамнан тұрады.

"Әртүрлі сумен жабдықтау тәсілдері тек қолжетімділікті қамтамасыз етіп қана қоймай, қаржылық шығынды тиімді пайдалануға мүмкіндік берді", - деп атап көрсетті Қажкенов.