Сиднейдегі атысты әке мен бала жасағаны анықталды

Жексенбі күні Сиднейдегі Бонди-Бич жағажайында болған атыс салдарынан 15 адам қаза тапты, сондай-ақ шабуылдаушылардың бірі көз жұмды, деп хабарлайды Arasha.kz.

Алдын ала мәліметтер бойынша, оқ атқандар екеу болған. Полиция олардың әке мен бала екенін мәлімдеді: 50 жастағы ер адам оқиға орнында өлтірілген, ал оның 24 жастағы ұлы ауыр халде ауруханаға жеткізілді. Шабуыл сәтінде жағажайда еврей халқының Ханука мерекесін тойлау басталған. Полиция бұл оқиғаны теракт деп бағалады.

Куәгерлердің айтуынша, аптап ыстық кеште адамға лық толы әйгілі жағажайдағы шабуыл шамамен 10 минутқа созылған.

Жексенбі күні жергілікті уақыт бойынша сағат 18:47-де (Гринвич уақытымен 7:47) Сидней полициясына жағажай маңындағы шағын саябақта Ханука мерекесі кезінде атыс болғаны туралы хабар түскен. Бұл жиынға мыңнан астам адам жиналған.

Кейінірек Би-би-си верификациялаған бейнежазба пайда болды: онда екі адамның бірнеше минут бойы жағажайға апаратын өткелден адамдарға оқ атқаны көрінеді. Тағы бір видеода өткелден жағажай жаққа түскен атқышты бір адам артынан келіп, тап беріп, қолындағы мылтығын тартып алғаны байқалады. Осыдан кейін шабуылдаушы кетіп қалған.

Қаза тапқандар саны арта түсті. Жаңа Оңтүстік Уэльс штатының денсаулық сақтау министрі Райан Парктың айтуынша, соңғы мәлімет бойынша, шабуыл салдарынан 15 адам қаза тауып, шабуылдаушылардың бірі де өлген.

Полиция брифингінде 50 жастағы ер адам оқиға орнында өлтірілгені, ал оның 24 жастағы ұлы ауруханада ауыр халде жатқаны хабарланды.

Шабуылдан кейін тағы 40 адам ауруханада қалып отыр, олардың ішінде ауыр, бірақ тұрақты жағдайда жатқан екі полицей бар. Полиция мәліметінше, құрбандардың жасы 10 мен 87 жас аралығында.

Ресми тұлғалар жексенбідегі атысты нысаналы антисемиттік шабуыл деп сипаттады. Полиция бұл оқиғаны Сиднейдегі еврей қауымдастығына қарсы жасалған теракт деп санайтынын мәлімдеді. Сондай-ақ шабуылдаушыға тиесілі болуы мүмкін көліктен «бірнеше қолдан жасалған жарылғыш құрылғы» табылуы ықтимал екені айтылды.