Солтүстік Қазақстан облысында жалпыұлттық коалиция мүшелері жаңа Конституция жобасын білім, ғылым, мәдениет саласы өкілдерімен талқылады

Петропавлда Қазақстан Республикасы Премьер-министрінің орынбасары – Мәдениет және ақпарат министрі, Конституциялық реформалар жөніндегі комиссия төрағасының орынбасары Аида Балаеваның төрағалығымен білім, ғылым және мәдениет саласының қызметкерлері «Әділетті және Прогрессивті Қазақстанның Халықтық Конституциясы үшін!» жалпыұлттық коалиция мүшелерімен кездесті, – деп хабарлайды Aikyn.kz сайты.

Іс-шараға ҚР Парламенті Сенатының депутаты, Сенат төрағасының орынбасары Ольга Перепечина, ҚР Парламенті Мәжілісінің депутаты, «AMANAT» партиясы фракциясы жетекшісінің орынбасары Ерлан Саиров, «Қазақстандық қоғамдық даму институты» басқарма төрағасы Жұлдызай Ысқақова, Қ. Жұбанов атындағы Ақтөбе өңірлік университеті Директорлар кеңесінің төрағасы, Астана қаласы мәслихатының депутаты Талғат Дүйсеков, М. Қозыбаев атындағы Солтүстік Қазақстан университетінің Директорлар кеңесінің төрағасы Ғалым Байтук және басқалар қатысты.

Жиында Аида Балаева жаңа Конституцияның түпкі философиясы адамға, азаматтардың игілігіне бағдарланғанын атап өтті.

«Жаңа Конституцияда адам капиталы ел дамуының басты басымдығы ретінде айқын белгіленген. Жаңа экономикалық өсу моделінде адам капиталының сапасы, оның кәсіби біліктілігі мен жаһандық бәсекеге қабілеттілігі шешуші рөл атқаратын болады. Ғаламдық экономикалық дағдарыстар мен геосаяси сын-қатерлер күшейген жағдайда, елдің тұрақтылығы мен гүлденуі ең алдымен білімді ұлтқа, мықты ғылыми әлеуетке және инновациялық ойлау қабілетіне негізделеді. Осылайша, жаңа кезеңде мемлекеттің дамуындағы басты өлшем – адамның білімі, ғылыми ізденістері мен шығармашылық әлеуеті. Білім, ғылым, мәдениет және инновация салаларына ерекше көңіл бөлінді, ал ұлттық мәдениетті қолдау және тарихи-мәдени мұраны сақтау Конституцияның негізгі принциптеріне айналды. Конституция жобасында адамға бағытталған тәсіл айқын көрсетілгені және «білім», «ғылым» және «инновациялар» сияқты маңызды құндылықтардың алғаш рет Конституция деңгейінде бекітілгені өте маңызды», – деді Аида Балаева.

Сенат депутаты Ольга Перепечина Қазақстан жаңа саяси даму кезеңіне қадам басып, бұл реформа қоғамның кең қолдауына ие болып, барлық басқару жүйесін сапалы жаңартуға мүмкіндік ашатынын атап өтті. Оның айтуынша, жаңартылған Конституция білім, ғылым және ұлттың шығармашылық әлеуетін дамытуға құқықтық негіз қалыптастырады.

«Жаңа редакция мемлекеттік оқу орындарында бастауыш және орта білім алудың тегін берілуіне кепілдік береді. Бірақ білім алу құқығы ғана емес, оның сапасы да маңызды. Білім ғылымның, инновациялардың және адам капиталының негізі ретінде қарастырылады. Ғаламдық бәсекелестікте аумақ емес, білім жеңеді. Сондықтан мемлекет мұғалімдерді қолдауға, оқу бағдарламаларын жаңартуға, цифрлық сауаттылықты, сыни ойлауды және жастардың шығармашылық дағдыларын дамытуға мүдделі», – деді Ольга Перепечина.

Ерлан Саиров өз сөзінде елімізде жүргізіліп жатқан саяси реформалар демократиялық институттарды нығайтуға және қоғамдық сананы дамытуға бағытталғанын айтты. Ол жаңа Конституция жобасы Қазақстанның саяси жүйесін ХХІ ғасырдың талаптарына бейімдеу жолындағы маңызды қадам екенін атап өтті.

Отырыста Жұлдызай Ысқақова жаңа Конституция жобасы тек құқықтық құжат болып қана қоймай, заманауи қоғамдық және құндылық бағдарларды көрсететінін айтты. Оның айтуынша, бұл құжат нағыз қоғамдық келісім-шарт ретінде қалыптасып, қоғамның бірлігі мен консенсусы негізінде жасалмақ.

«Біз Конституцияны дамыту бойынша түрлі елдердегі конституционалистермен кездестік және көріп отырғанымыздай, біздің Конституция – бұл тек құқықтық құжат емес. Бұл шынайы қоғамдық келісім-шарт, онда даму үшін маңызды құндылықтар көрініс тапқан. Ең бастысы, бұл құжат консенсусқа негізделген. Біз –біртұтас қоғамбыз және Конституция осы бірлікті бекітеді», – деді ол.

Кездесу соңында Жалпыұлттық коалиция мүшелері қатысушылармен ашық әңгіме құрды. Қорытынды сөз халықтың қолында екені айтылып, 15 наурызда жаңа Конституция жобасы бойынша өз позицияларын білдіруге болатындығы сөз етілді.