Сот үйқамақ шарттарын бірнеше мәрте бұзғаны үшін ҚазТАГ бас редакторының бұлтартпау шарасын өзгертті

Фото: istockphoto.com

Сот отырысы барысында мемлекеттік айыптаушы ҚазТАГ агенттігінің бас директоры Әмір Қасеновке қатысты үйқамақ түріндегі бұлтартпау шарасын күзетпен ұстауға ауыстыру туралы өтінішхат берді.

Сот мәліметінше, 2025 жылғы 24 желтоқсандағы қаулыға сәйкес айыпталушыға әлеуметтік желілерді, интернет желісін, байланыс құралдарын пайдалануға және хат-хабар алмасуға тыйым салынған болатын. Кейін 2026 жылғы 5 маусымда іс сот өндірісіне қабылданған кезде бұлтартпау шарасы өзгеріссіз қалдырылған.

Алайда Әмір Қасенов 2026 жылғы 2 маусымда қаралып жатқан қылмыстық іске қатысты жеке бейнеүндеу жариялап, үйқамақ талаптарын бұзған. Сондай-ақ 15 маусым күні интернет-ресурстарда іс бойынша медиация мәселесіне байланысты тағы бір видеоүндеу таратқан.

Бұдан бөлек, ол 11 маусымда өтетін басты сот талқылауы туралы тиісті түрде хабарланғанына қарамастан, сот отырысына келмеген. Тараптардың уәждерін тыңдап, ұсынылған материалдарды зерттеген сот мемлекеттік айыптаушының өтінішін қанағаттандыру туралы шешім қабылдады.

Сот қаулысымен Әмір Қасеновке қатысты бұлтартпау шарасы үйқамақтан күзетпен ұстауға өзгертілді.

«Фридом Финанс» адвокаты «ҚазТАГ»-пен арадағы даудың неге қылмыстық сотқа дейін жеткенін түсіндірді

Келесі сот отырысы 22 маусым күні сағат 10:00-ге белгіленді.

Еске салайық, бұған дейін ҚазТАГ агенттігінің бас директоры Әсет Матаев пен бас редакторы Әмір Қасеновқа қатысты қылмыстық іс қозғалып, олар көрінеу жалған ақпарат тарату бабы бойынша күдікті деп танылған болатын.