​Сотталған экс вице министрдің бауыры Атырау мұнай өңдеу зауытын басқаруы мүмкін

«ҚазМұнайГаз» АҚ Мұнай өңдеу жөніндегі басқарушы директоры Мұратжан Мұсайбеков Атырау мұнай өңдеу зауытының (АМӨЗ) жаңа бас директоры болуы мүмкін. Егер тағайындалса, АМӨЗ басшысы орындығының оқиғаларға толы ұзақ тарихында кезекті тарау ашылайын деп тұр.

Тағайындалуы мүмкін деген кадрлық шешім туралы Pro Кадры kz Telegram-арнасы хабарлады.

«ҚазМұнайГаз» тарапынан да, АМӨЗ тарапынан да ресми хабарлама әлі түскен жоқ. Дегенмен, таңертең PetroCouncil Telegram-арнасы қазіргі бас директор Қуаныш Бишимовтың жақын арада қызметінен кететінін хабарлаған еді. Еске салсақ, ол зауыт тізгінін өткен жылдың сәуір айында ғана қолға алған болатын.

Мұратжан Мұсайбеков 1974 жылы туған. Қазақ мемлекеттік басқару академиясын («Экономист»), «Әділет» заң академиясын («Заңгер-құқықтанушы») және Атырау мұнай және газ институтын («Органикалық заттардың химиялық технологиясы») бітірген.

Әр жылдары Алматы қаласының салық органдарында, ICS Inspection and Control Services Kazakhstan, «Васильковский ГОК» және «Алтыналмас» компанияларында қызмет атқарған.

2009 жылдан бастап Мұсайбековтің еңбек жолы «ҚазМұнайГазбен» тығыз байланысты. Ол KPI Inc. компаниясын басқарды, «ҚазМұнайГаз — өңдеу және маркетинг» ЖШС бас директорының орынбасары болды, АМӨЗ басқарма құрамына кірді, ал қазіргі уақытта ҚМГ-ның Мұнай өңдеу жөніндегі басқарушы директоры қызметін атқарады. Яғни, ол бұл зауыт үшін жат адам емес.

Дегенмен, оның өмірбаянында тағы бір назар аударарлық жайт бар. Мұратжан Мұсайбеков — 2021 жылы алаяқтық үшін сотталған Мәдениет және спорт министрлігінің бұрынғы вице-министрі Сәкен Мұсайбековтің туған бауыры.

Ол кездегі оқиға дерлік кино сюжетіндей өрбіген еді. Сәкен Мұсайбеков Астана әуежайында Дубайға ұшпақ болған жерінен ұсталды. Оның жанынан әйелдердің Hermès сөмкесі мен 5 мың доллар табылды. Бастапқыда Сыбайлас жемқорлыққа қарсы қызмет букмекерлік бизнес саласындағы компанияның мүддесін қолдау ісі бойынша тергеу жүргізген. Кейін айыптау алаяқтық бабына қайта сараланды. Сот бұрынғы шенеунікті кінәлі деп танып, оған 62,394 млн теңге көлемінде айыппұл салды. Сөмке мен ақша мемлекет пайдасына тәркіленді.

Бұдан кейін оның мансабы аяқталды сияқты көрінгенімен, олай болмады. Айыппұлды төлегеннен кейін Сәкен Мұсайбеков үлкен спортқа оралып, алдымен Қазақстан хоккей федерациясын басқарды, кейін «Барыс» хоккей клубының бас директоры болды.

Енді, міне, Мұсайбековтердің тегі елдегі ең ірі өнеркәсіп кәсіпорындарының біріне басшы тағайындалуы мүмкін деген жаңалықтарда қайтадан бой көрсетіп отыр.

6 тамыз, 16:38